Atualità
L film sun l’autonomia "stimmen voci ujes" n dumënia sun RAI3
USP – L svilup dl Südtirol cuntà cun de pitla stories persuneles: chësc ie da udëi tl film "stimmen voci ujes" che ie unì fat n ucajion di 40 ani d’autonomia per la Provinzia de Bulsan sun scumenciadiva dla Jonta provinziela. L film vën mustrà n dumënia 7 de auril, dala 9.25 sun RAI3.
Danter la scumëciadives che la Provinzia à nvià via ntan l 2012 per sorissé i 40 ani dl'autonomia nueva, iel nce l film "stimmen voci ujes" che ie unì fat da Federico Campana y Alessandro Bandinelli che se à nuzà dl archif de vedli filmac "Bewegtes Leben - Vita n muvimënt". I doi filmmaker à cialà tres l material storich tenì su tl Ufize provinziel per media audiovisuei ulache l ie 1.500 rodl cun 450 ëura de material tëut su da 500 pasciundei sun films Super8. I material cris ora ie unì metù adum cun stories de vita de persones da uni di che testemunieia l svilup de nosc raion.
L film "stimmen voci ujes" cun pec per talian, tudësch y ladin (cun sottituli) vën śën mustrà per l prim iede te televijon. N dumënia 7 de auril, dala 9.25 uniral mustrà sun RAI3 ntan la trasmiscion "Passpartù" realiseda dala RAI de Bulsan. Ntan 30 menuc vëniel cuntà de pitla stories per mustré su na gran storia, chëla d'autonomia, cunteda tres l'esperienzes de jënt de tëmp y nce de jëuni. La ujes de chësta testemunianzes ie unides metudes adum cun toc de films storics sun la vita da uni di. A chësta maniera vën a lum la gran mudazion che ie stata te nosta provinzia, mustreda da de plu ponc de ududa.
L film sun DVD ie nce da giapé debant pra l Servisc de comunicazion dla Provinzia (usp@provinzia.bz.it; palaz Widmann, plaza Silvius-Magnago 1, Bulsan).
Na cërcia de "stimmen voci ujes" giaten sun l canal Youtube "Provinzia de Bulsan"
as
