Atualità
Lores “M14” ai 15 de auril tl Museum Natura a Bulsan
USP – La lores che l ann passà d’auril fova ruveda sota n auto a Kollman, sarà da udëi tl Museum Natura a Bulsan. Na sezion nueva de chësc museum dedicheda al lores y al lëuf che ruva inò tl’Elpes unirà giaurida n lunesc, 15 de auril dal presidënt dla Provinzia Durnwalder y l’assessëura Kasslatter Mur.
L ie bele 8 ani che la lores rossa passa for inò tres l Südtirol. Chësc ie unì a se l dé da canche dl 1999 fovel, tres proiet interreg, unì cialà de mantenì la lores tl raion de Adamello-Brenta. La lores se muef dassëules y uni una defënd n si raion. Per chësta rejon se n va i mandli for inò da ulà che i ie cresciui su y se orienteia aldò che i giapa da maië. L Südtirol ie per ëi n raion da traversé. Nscì iela stata cun la lores M14 che fova stata bona de atraversé la Etsch, l stradon Me-BO y la scines dla ferata. Ai 21 de auril 2012 fovela pona a Kollman ruveda sota n auto.
La lores M14 ie ntant unida anjenieda ca da Peter Morass dl Museum Ferdinandeum de Dispruch y sarà da udëi tl Museum Natura a Bulsan. Te na sezion nueva dl museum puderan nrescì co che la lores rossa vif tl'Elpes. Tlo uniral nce prejentà co che l vën studià l cumpurtamënt de chisc tieres y co che ie la situazion atuela tl'Elpes. Leprò ruva mo na pert dedicheda al lëuf. Chësc vën dai Apennini su per l Piemonte y la Lombardia, o dal'autra pert, dala Slovenia de viers dl'Elpes. I lëufes ie spevesc, i mët plu verda y se mostra de manco che la lores. Tl Museum Natura saral da udëi si fusties y la cherta de ulà che i se muef.
La mostra permanënta tl Museum a Bulsan ie unida anjenieda n culaburazion cun l Ufize provinziel per la ciacia y unirà giaurida n lunesc, 15 de auril dala 18.00, tla sënta dl Museum Natura, streda Binder 1 a Bulsan. Ghesć de unëur sarà l presidënt dla provinzia Luis Durnwalder y l'assessëura Sabina Kasslatter Mur.
L Museum Ladin Ursus Ladinicus a S.Ciascian, gëura al'incontra bele n vënderdi ai 12 de auril na si sezion dedicheda ala lores M12.
---
Culaburadëures di media ie nviei ala giaurida y de fé al savëi dla sezion nueva.
as
