Ambiënt | 08.04.2013 | 16:22

Jonta provinziela da pro 158 milion per l KlimaLand Südtirol

USP – Cun l inuem de KlimaLand uel la Jonta provinziela mëter l Südtirol n mostra sciche ejëmpl n cont de cunsum de energia y adurvé energia alternativa. (NCUEI) Ai 8 de auril ala dat pro na l’idea de taché adum i proiec da mustré dant. Ntan i proscimi 15 ani dëssa l’Aministrazion publica y privac fé nvestimënc per 158 milion per mustré su l Südtirol sciche KlimaLand.

Cun na strategia de sparanië energia uelen smëndrì l'emiscion de 5,1 tones de anidrida de carbonium per persona al ann, ruvan tla provinzia de Bulsan ju a 1,5 tones. "On bele na lingia de proiec che desmostra nosc mpëni. Cun duc i frabicac, i mplanc, la strategies de trasport, mostres y per ejëmpl la Cësa Tlima, pudons mustré su co smëndrì l cunsum de energia tradiziunela y nuzé alternatives" à dit l presidënt dla Provinzia do la senteda dla Jonta.

Deberieda cun esperc se à i assessëures dat ju cun l'idea dl KlimaLand. Aldò de n studi unissel trat adalerch mesa milion de vijitadëures. Aldò di conc, pudëssel unì a se l dé n valor 6,2 milion de euro per l turism, 10 milion per l cumerz, 4,5 milion per i servijes y nchinamei 40 milion per l ciamp dl frabiché.

La realisazion dl cunzet unissa a custé 158 milion de euro, tenian cont che mesa la soma ie bele unida segureda. La Provinzia sustën proiec de firmes cun 79 milion de euro, fej nstëssa pruvedimënc per 42 milion de euro y uel abiné ite tres na culaburazion partner privat-publich mo d'autri 37 milion de euro. Te n parcours dëssel unì tëut ite firmes de ejëmpl sciche Salewa, Technoalpin, Athesia Energy y Hafner. Deberieda cun l zënter de inuvazion TIS, l mplant per l refudam a Bulsan Sud y i sistems de sciaudamënt a destanza, dëssel unì mustrà su l'arjontes dl KlimaLand. Durnwalder à rujenà de na mostra ala lergia sun l Kaiserberg de Sigmundskron y dl mplant a idrogenn a Bulsan Sud che pudëssa unì tëuc ite tl parcours.

La Jonta provinziela à dat pro de mëter su n cumité cun reprejentanc dla Provinzia, dla zità de Bulsan y firmes nteressedes per purté inant riesc la realisazion dl'idea data pro.

as

Galaria dales fotografies

L Kaiserberg pudëssa deventé pert de n parcours per prejenté l Südtirol sciche KlimaLand (foto USP).