Atualità

Frabiché | 15.04.2013 | 15:35

Jonta provinziela da pro l “sparani per n cuatier”

Acioche i jëuni se feje plu saurì a ruvé pra n si cuatier iel unì laurà ora n program se sparani speziel che se urientea al model “Bausparen” ti paejes de rujeneda tudëscia. La Jonta provinziela à (NCUEI) ai 15 de auril n linea de mascima dat pro l “sparani per n cuatier” laurà ora deberieda cun l fond de pension sëuraprò Pensplan.

L program de sparani per n cuatier ie na forma de sustëni acioche jëuni ruve plu saurì pra n cuatier de si avëi. "Chësc model ne puderà na jì bën per duc, ma l ie na forma nueva sëuraprò al sustëni che vën bele pità dala Provinzia" à dit l l presidënt Luis Durnwalder riesc do la senteda dla Jonta provinziela. Partner prinzipel dl "sparani per n cuatier" ie l fond de pension sëuraprò Pensplan. Nfati se urientea l program de sustëni a na forma de sparania tres l fond de pension pra chël che sauta ora vantajes de chëuta. L ne ie nia da paië l 23 percënt te chëutes sciche pra la licuidazion. Nteressei possa paië ite cater percënt de plu te si fond de pension y a chësta maniera sparanië velch per se fé o cumpré n cuatier.

L Fond de pension o l Fond provinziel de rotazion pieta n mprëst a miëur marcià de mo n tant che n ie stai boni de sparanië tla forma nunzieda dessëura.

Tl ejëmpl prejentà dal presidënt te cunferënza stampa ruva n jëunn (cun n paiamënt lordo de 34.000 euro al ann) a sparanië te tëmp de 10 ani 40.000 euro, calculan nce l 10 percënt dla licuidazion che l possa se damandé danora (plu 1,5% de si paiamënt y la medema soma paieda ite dal patron de lëur). L dopl de chësta soma, 80.000 euro ti vëniel mprestà a n miëur priesc dal fond de pension. L medemo giatel nce dala banches da tlo. Leprò ruva mo n cuntribut provinziel da 20 a 30.000 euro. "Sce te na copia iel tramedoi che à fat n tel program y cun l sustëni di genitores, ie bën realistich che n jëunn posse se fé o cumpré n cuatier" à dit l presidënt Durnwalder.

La doi somes mprestedes dëssa unì paiedes ju te tëmp de 20 ani. "Cun rates da feter 300 euro al mëns, iel mesun paië de reviers l mprëst ala banca" à dit l presidënt. L mprëst dala Provinzia muessa permò unì paià de reviers tl mumënt de jì n pension.

Per la Provinzia unirà l program "sparani per n cuatier" a custé da 150 a 200 euro per persona per n'assegurazion n cajo de desgrazia, mort o che l segurà pierd si stiera de lëur. Leprò ruva mo la spëises de aministrazion l aumënt di cuntribuc provinziei de feter un percënt. Tl prim saral de bujën de na regulamentazion transitoria. Per chësc tëmp à i assessëures provinziei udù dant 20 milion de euro per l fond de rotazion per chiche à bele sparanià 15.000 euro te si fond de pension regiunel. (USP)