Atualità
Presidënza dla Provinzia nce tla rujeneda ladina
La prejentazion y i servijes dla Presidënza dla Provinzia de Bulsan tl internet ie śën nce da abiné tla rujeneda ladina. La nueva plates web ie da (NCUEI) ai 17 de auril online. “Sciche Presidënza laurons per duta trëi grupes de rujeneda, perchël nes iel mpurtant avëi nce na verscion ladina dla nfurmazion tres internet” sorissea l presidënt dla Provinzia Durnwalder.
La plata web www.provinzia.bz.it/presidenza-ladin prejënta te sies ponc prinzipei i ciamps de cumpetënza aministrei diretamënter dai ufizies dl presidënt. L Euroregion y l ufize a Roma ie i ponc de riferimënt per cuestions che va sëura la sëides provinzieles ora. Ciamps de cumpetënza che reverda plu daujin i zitadins ie l Servisc zevil y soziel cun la scunanza di cunsumadëures. Sun la plata anjenieda da nuef iel mplu nce da abiné nfurmazion n cont di dërc n cajo de viulazion dl'adurvanza dla rujeneda dl'oma y de co che possa unì adurvà l blason dla Provinzia.
"Nchinamò ne iel nia stat mesun anjenië la plates web de duta la repartizions provinzieles tla rujeneda ladina, cun la prejentazion dla Presidënza ons ulù jì danora cun l bon ejëmpl" spiega l presidënt Luis Durnwalder. La plates nueves pieta nce na porta a de plu servijes che fej pert dla Presidënza: la puscibltà de damandé velch al presidënt, la nuviteies dates ora dal Ufize stampa, l Servisc de ejams de bi- y trilinguism, la culaburazion al svilup y la cuestions che reverda l ulentariat y la lies. "L internet vën adurvà for de plu nce ti luesc ladins y dai ladins che ie jic a sté ora per l mond. La plates web dla Presidënza ie n auter var mpurtant per n cuntat plu da daujin de Provinzia yl zitadin de rujeneda ladina" sorissea l assessëur ladin Florian Mussner.
La plata web dla Presidënza dla Provinzia ie unida anjenieda dala sozietà de nfurmatica SIAG n culaburazion cun l Ufize provinziel per cuestions linguistiches. (USP)
Adres dla Presidënza per ladin
www.provinzia.bz.it/presidenza-ladin
as
