Atualità
Internet aslune: mesa la zentreles ie anjeniedes
I lëures de adatamënt dla zentreles dal telefonn a na maniera che les vede bën per l internet aslune va inant. Cun doi desëines de zentreles che ie bele anjeniedes per l internet aslune ie mesa la zentreles a post, l’autra meses unirà mo ativedes ntan i proscimi mënsc.
Mëter ju roles, tré tres i cabli de fibra otica, adaté la zentreles dal telefonn, anjenië l'ultima maila: "miuré la rë de internet aslune ie n gran mpëni, a chël che son me boni de ti vester te na bona culaburazion cun i chemuns y la sozieteies dal telefonn" dij l assessëur Florian Mussner. La spartizion di lëures vëija dant che la Provinzia se cruzia di 150 chilometri de roles y 240 chilometri de fibra otica che mancia mo (650 chilometri de roles y 560 chilometri de fibra otica ie bele metui ju). L vën laurà per pudëi taché ite duc i majeri luesc ala rë de internet aslune nchin ala fin dl ann, nsci sciche la Jonta provinziela se à tëut dant.
Ma chësc ne basta nia: tl medemo tëmp muessa nce la vedla zentreles dal telefonn dla telecom unì anjeniedes per l internet aslune. Chësc vën fat tl cheder de n'acurdanza danter la Provinzia y la Telecom, te chëla che la Provinzia se mpënia a ti fité la rë de fibra otica ala Telecom. La sozietà dal telefonn se mpënia de taché ite si zentreles ala rë de fibra otica fajan na nvestizion de feter 3,6 milon de euro. A chësta maniera vëniel aumentà la capazità dl culegamënt internet danter la zentrela y l tlient a set megabit per secunt.
"I lëures che reverda l adatamënt dla zentreles ie bele mez finei" dij Mussner. 24 zentreles telecom ie bele anjeniedes y nchin d'instà ne n uniral mo adatà feter doi desëines.
Per ruvé nchin pra la cëses, muessel nce unì fat l ultimo toch, l'ultima maila. Chësc lëur se à sëurantëut i chemuns. "La culaburazion cun i chemuns ie nvieda via y nëus son a desposizion cun l savëi tecnich canche l ie de bujën" dij l assessëur provinziel.
L ufize provinziel per nfrastrutures juda a fé l masterplan per i chemuns, ma nce per cialé do la roles che ie bele per se udëi ora ula junté i cabli de fibra otica. "Deberieda nes on tëut dant de miuré i culegamënc digitei te nosc raion provinziel, a na maniera che la populazion privata y la firmes posse lauré cun l internet aslune, unfat sce les ie te zità o ti pitli luesc da na pert ora", spiega Mussner: "la nvestizions ie grandes, ma sce ne fajon nia nvestizions te nosc daunì digitel, restons sun streda". (USP)
as
