Atualità
Museum Gherdëina y Lizeum d’Ert gëura ai 10 de mei na mostra speziela
L Museum Gherdëina presentea tla mostra temporera “Clochards & roba da fé da mat“ lëures de sculées y sculeies dl Lizeum d’Ert “Cademia“ criei sun ispirazion de na selezion de pec dl museum. Cun chësta mostra tol l Museum Gherdëina pert ala scumënciadives per “l ann dl pez dl museum”. La mostra vën giaurida n vënerdi, 10 de mei, dala 10.00.
L Museum Gherdëina à n patrimone rich de pec storich-culturei y de scienza naturela. Tl ann dl pez dl museum sot al moto "1000+1 pec conta la storia", ulëssa nce l Museum Gherdëina ti purté daujin chësta richëza de pec da museum y la stories liedes limpea nce ai jëuni y ala jëunes y a si mond de vita cuncret. D'autonn dl 2012 à l Museum de Gherdëina perchël metù a jì n proiet cun l Lizeum d'Ert "Cademia".
De ndut 93 sculées y sculeies di prim ani de scola se à dat jù ntensivamënter cun pec uriginei crisc ora dala culezion d'artejanat artistich y de chiena dl 18ejim y dl 19ejim secul y à nterpretà da si pont d'ududa persunel y aldò de si imaginazion la tematica dla "puertà" y dl "juech". Tl zënter de chësta usservazion y reflescion fovel reprejentazions populeres de petleri, vagabonc y clochards da una pert y articui de roba da fé damat de Gherdëina tradiziunei dal'autra pert.
Na selezion de chisc lëures de nterpretazion nueva dla sculées y di sculeies vën śën presenteda tl cheder dla mostra temporera "Clochards & roba da fé da mat" adum cun i pec uriginei dla mostra permanënta dajan vita nsci a n cuntest scialdi nteressant. La contraposizion de pec da museum tradiziunei y criazions artistiches da pert de persones jëunes nes sburdla a se damandé ciunes che fova povester la stories che se scuend do la tematiches ambivalëntes dla „puertà" y dl „juech".
La presentazion y la giaurida dla mostra temporera
„Clochards & roba da fé damat" ie
n vënerdi, ai 10 de mei
dala 10.00
tl Museum Gherdëina, Cësa di Ladins, Streda Rezia 83 a Urtijëi.
L tulerà pert la sculées y i sculeies dl Lizeum d'Ert Cademia, la diretëura dl Museum Gherdëina Paulina Moroder, la nseniantes Thea Blass, Christa Kasslatter y Markus Delago sciche nce l Ntendënt dla Scoles ladines Roland Verra y la diretëura dl Lizeum d'Ert Elisabeth Baur.
La sculées/i sculeies dla prima y terza tlasses se à dat ju cun la vita de persones zënza cësa y de petleri y à svilupà lëures de materiai defrënc sciche p.ej. mauta, fiertrat, pezes, lën, mitel, plastica, gumi. La tematica dla roba da fé da mat ie unida trateda dala sculées y dai sculeies dla segonda tlas, che l'à nterpreteda da nuef tres formes geometriches y culëures se pensan ora juesc tatics y de muvimënt.
La mostra temporera "Clochards & roba da fé da mat" possa unì vijiteda nchin ai 11 d'utober. L Museum ie daviert dai 15 de mei da n lunesc nchin n vënerdi dala 10.00 nchin la 12.00 y dala 14.00 nchin la 18.00. N dumënia, ai 12 de mei 2013, tl cheder dl di nternaziunel di museums, uniral pità ntan dut l di vijites menedes tres la mostra.
Infos: Museum Gherdëina, Cësa di Ladins, Streda Rezia 83, Urtijëi, Gherdëina, Tel. 0471 797554, www.museumgherdeina.it. (USP)
usp
