Atualità
Ai 15 de mei vëniel prejentà i prim resultac definitives dla cumpededa dla jënt
Cun la cumpededa dla jënt à l Istitut provinziel de statistica ASTAT y l istitut naziunel ISTAT fat na nrescida sun duta la populazion. La prima pert di resultac definitives unirà prejentei n mierculdi 15 de mei dal presidënt dla Provinzia Durnwalder te na cunferënza stampa a Bulsan.
Uni diesc ani vëniel fat na nrescida sun duta la populazion che vel sciche basa per truepa d'autra nrescides. Davia che la Cumpededa dla Jënt porta na gran mont de dac, se damanda la valutazion n gran lëur. Do plu mënsc ie la prima pert di resultac definitives śën dan man y chisc unirà prejentei te na cunferënza stampa
n mierculdi 15 de mei
dala 11:00 tla sala stampa dla Jonta provinziela
palaz Widmann a Bulsan.
L presidënt dla Provinzia Durnwalder rujenerà dl mpëni politich n relazion al svilup demografich, ntan che Johanna Plasinger dl ASTAT prejenterà l svilup dla populazion che n possa udëi ora dai resultac dla cumpededa. Per cont dl ISTAT spiegherà Giuseppe Stassi la nuviteies dl'ultima cumpededa y i programs per l daunì.
Te chësta ucajion uniral nce prejentà l'edizion da chëst ann dl liber demografich. (USP)
as
