Atualità
14 de jügn: unitês didatiches plurilinguistiches por la scolina ladina
En vëndres ai 14 de jügn, ultimo dé de scora, vëgnel presentè a San Martin de Tor les unitês didatiches nöies por l’insegnamënt de de plü lingac. Chësc material de insegnamënt por les scolines ladines vëgn presentè dales 14.00 tl salf dl Istitut Micurà de Rü a San Martin de Tor.
Dal ann de scolina 2005/06 incà laôra les scolines dla Val Badia y de Gherdëna cun suzès al proiet "Vari tl plurilinguism" che ti porta pormez ai mituns y ales mitans dlungia le lingaz ladin inće le lingaz talian y todësch aladô dl prinzip dla didatica linguistica integrada. Cun n ordinn linguistich de trëi corusc ti vëgnel portè pormez ai pici te na manira plajora y sot forma de jüch les competënzes de basa di 2 lingac manco conesciüs. Les inrescides neurolinguistiches confermëia che le ciorvel laôra te na manira integrala se anuzan pro vigni lingaz dles competënzes linguistiches che é bele danman.
La mapa cun les unitês didatiches laurada fora da maestres dla scolina cun la suravijiun scientifica dl prof. Rico Cathomas pîta stromënć didatics atuai y d'ütl por podëi laurè plü saurì cun chësta metodologia cun i pici. Les tematiches dles 30 unitês didatiches reverda la natöra, i tiers, le savëi sön le corp, le mangé, i corusc y stories desvalies adatades al'eté dla scolina.
La mapa é gnüda dada fora dal Ćiamp Inovaziun y consulënza dl Departimënt Educaziun y Cultura ladina.
I colaboradus y les colaboradësses di media é dër bel invià ala presentaziun dla mapa dles unitês didatiches plurilinguistiches por la scolina
en vëndres, ai 14 de jügn dales 14.00
tl salf dl Istitut Micurà de Rü
a San Martin de Tor
y da lascè alsavëi chësta novité.
L'introduziun gnarà fata dala ispeturia Edith Ploner deboriada cun la direturia Hannelore Insam. Le professur Rico Cathomas baiarà dla promoziun dl plurilinguism tla scora y dedô podaràn odëi n film sön i vari dl plurilinguism. Pro la secunda pert dla presentaziun fajarà l'intendënt Roland Verra na introduziun ala publicaziun di materiai didatics y Rosmarie Senoner presentarà ejëmpli fora de na unité didatica. (USP)
usp
