Politica | 10.06.2013 | 14:22

Jonta provinziela y chemuns per na zentrela de gestion dl internet aslune

La Jonta provinziela y l Cunsëi di 116 chemuns dl Sudtirol ie stai a una de mëter a jì na zentrela sëula per la manutenzion y gestion dla rë de culegamënc internet aslune. Chësc ie unì fat ora (NCUEI) ai 10 de juni tl palaz Widmann a Bulsan ulache l ie unì tenì na senteda deberieda.

La Provinzia ie tl lëur de mëter a jì na rë de fibra otica per arjonjer duc i chemuns dl Sudtirol. I Chemuns se cruzia dl'ultima pert dala zentrëles dl luech (zentrela pop) nchin dan la cëses. Ma co dëssa pa chësta rë unì meneda canche la sarà fineda? La manutenzion y la gestion dla rë de culegamënc internet aslune, dëssa unì meneda da na zentrela sëula. Aldò l presidënt dl cunsorz di chemuns, Arno Kompatscher, che à tenì la cunferënza stampa derberida cun l presidënt dla Provinzia Luis Durnwalder, uniral metù a jì n'acurdanza danter Provinzia y Cunsorz di chemuns. "Do che la gran rë sarà ativeda, saral nce de bujën de na zentrela de ntervënt n cajo de vel dann y pona la coordinazion di ntervënc per la cuncé" à dit Kompatscher. A chësta maniera ne muessa l zitadin nia se ëujer a un di 116 chemuns o la Provinzia, ma a na zentrela sëula.

L segondo majer duvier de na zentrela de gestion sarà i cuncorsc per fité i culegamënc de internet aslune ala gran aziendes dal telefonn. Chisc cuncorsc, la selezion y i cuntrac unirà fai a inuem dla Provinzia y di 116 chemuns dl Sudtirol. Aldò di presidënc dla Jonta provinziela y dl Cunsorz di chemuns se tratela de lauré deberieda per arjonjer servijes che vede bën y che pieta de bon priejes per la populazion. (USP)

as

Galaria dales fotografies

Senteda deberieda per mené la rë de culegamënc internet deberieda: La Jonta provinziela cun l cunsëi di chemuns tl palaz Widmann a Bulsan (foto USP/mb).