Atualità

Economia | 17.06.2013 | 14:40

SEL te Jonta provinziela: resultac drët positives

N valor de 1,5 miliardes de euro, 430 culaburadëures y i priejes dal strom plu basc: chëstes ie la zifres plu mpurtantes che la sozietà dal strom SEL à prejentà (NCUEI) ai 17 de juni te Jonta provinziela. Tl stritoz per la cunzescions, uel la Jonta provinziela ruvé a una cun l’autra sozieteies dal strom per nia messei scrì ora la cunzescions da nuef y resië che les ruva tla mans de sozieteies da oradecà.

La Provinzia ie aziuner de maiuranza y nscì à la Jonta provinziela ulù audì velch plu avisa sun la situazion atuela dla sozietà SEL. "Aldò de trëi sciazedes à la SEL n valor de 1,5 miliardes de euro" à cunedì l presidënt dla Provinzia Luis Durnwalder do la senteda dla Jonta. Dl mprëst de 285 milion de euro iel me plu da paië ju 50 milion y chësc pudëssa - aldò de Durnwalder - unì fat te tëmp de trëi ani. Te chël mumënt fossa la SEL zënza debic. Tl ann 2005 ova la sozietà dal strom mo n volum de afares de 58 milion de euro al ann, ntant iesen ruvei su a 528 milion. L presidënt dla SEL Wolfram Sparber à nce pudù prejenté la zifra de 430 culaburadëures y nvestizions per 60 milion de euro. 16 milion de euro ie unic paiei a 22 chemuns per ntervënc ambientei y 105 milion de chëutes.

Da gran nteres per la Jonta provinziela ie nce la situazion atuela n cont di priejes dal stom che vën pitei ai zitadins. Aldò dl bënsté dl prufessëur nciarià Giuseppe Caia à la SEL i miëur priejes mo dan l'ENEL y la sozieteies trentines. Ezezion fej tlo la cooperatives che possa ti pité priejes mo plu basc a si cumëmbri.

Tl stritoz per la cunzescions dal strom se tratela śën de co che l vën purtà inant la tratatives cun l'autra sozieteies. "Ulon ruvé a una cun i autri ajache scrì ora dut da nuef cumporta me l pericul che deguna dla sozieteies da tlo giape la cunzescions" à dit Durnwalder spiegan che aldò dl decret Monti muessel bën unì tëut n cunsciderazion la somes per ntervënc ambientei, ma che per giapé na cunzescion dal'ega per fé strom à l priesc pità l majer pëis. "Gran sozieteies da oradecà che lëura per ejëmpl cun energia atomara à gran nteres a pudëi curì l'ëures de majer bujën cun mplanc a ega che se lascia mpië y destudé co che n i adrova. Perchël ie chësta sozieteies despostes a paië de plu che no chëles da tlo" à dit l presidënt dla Provinzia. La Jonta provinziela se purverà inant per ruvé a una cun la sozieteies dal strom da tlo per pudëi miré a fé deberieda la produzion dl strom, l cumerz y n cajo nce la spartizion. (USP)