Desvalì | 17.06.2013 | 15:24

Segurëza publica: nia dramatisé ma pruvedimënc cuncrec

De plu caji de ciavatedes ntan la nuet à purtà pro che la Jonta provinziela ebe tratà la cuestion dla segurëza publica tl Sudtirol. Aldò dl presidënt ne dëssa la situazion nia unì dramatiseda, purempò iela da tò sul scerio. I assessëures provinziei se damanda pruvedimënc coordinei da duta la pertes tuchedes.

Gheneda, pesc y segurëza ie elemënc fundamentei per la cualità de vita tl Sudtirol, à sorissà l presidënt dla Provinzia do la senteda dla Jonta. Per chësta rejon muessen nce fé dut l puscibl per garantì la segurëza publica. "L muessa vester mesun se nfidé ora de cësa de nuet y genitores ne dëssa nia messëi sté cun festide per i jëuni, canche i va ora de nuet" à dit Durnwalder, metan a cuer che n linea de mascima iela pu nscila.

Acioche la reste nce nscila iel damandà l mpëni da duta la pertes. "Sun la basa dla ciavatedes che ie states iel da mëter a verda y da tò pruvedimënc dures acioche l ne suzede nia mo de tei caji" à dit l presidënt. L ie de bujën che duta la istituzions publiches se mueve te na maniera coordineda a na maniera da schivé ciavatedes y viulënza. "Ulon tò pruvedimënc deberieda cun la forzes dl'orden" à dit Durnwalder.

Pra chëi che à lizënzes y pra urganisadëures de festes dëssel unì fat prescion sun l respet dla regules n cont de segurëza. "L personal de segurëza ne dëssa nia me cialé ti locai, ma nce sun la plazes dan porta" à dit l presidënt, lecurdan che da permò iel unì sotscrì n'acurdanza per la furmazion de personal de segurëza. Durnwalder ie dal'autra pert contra na verdia tres video: "chësc va contra la lidëza persunela, ora che sce la cameres vën metudes su tla lueges plu critiches".

La Jonta provinziela se damanda che la polizai mostre plu prejënza, scebën che la à bele fat n bon lëur ntan i ultimi mënsc. La culaburazion vën nce damandeda ai zitadins, te chëla che i fej al savëi l plu riesc puscibl caji de viulënza o ciavatedes. "Sce la jënt ne fej nia al savëi, ne ons nia velch da jì contra chisc che fej viulënza" à dit l presidënt dla Provinzia. (USP)

as