Atualità
Di dla biodiversità ai 29 de juni tla Val Badia
L di dla biodiversità vën chëst ann tenì sun i prei de Armentara, tl chemun da La Val. N sada ai 29 de juni vëniel ntan dut l di vijità y analisà la majera cumpëida de tieres y plantes che l sarà puscibl. Leprò vëniel nce pità jites menedes da esperc. Da sëira, dala 18.30, unirà i prim resultac prejentei tl paisc da La Val.
Per la 14esima edizion dl Di dla biodiversità, ti prei de Armentara, vëniel metù a jì na majera azion de tueda naturalistica sun l post che se à tëut dant de documenté tl tëmp de 24 ëura la majera cumpëida de tieres y plantes che se lascia. I resultac unirà pona ntegrei te na cherta dl raion. Da pont de ududa scientifich à chësta azion n gran valor ajache te uni edizion dl Di dla biodiversità iel unì documentà vel planta o tier che n ne cunesciova mo nia tl raion, o tl Sudtirol o nchinamei te duta la Talia. Tl medemo mumënt vëniel cun chësta scumenciadiva nce dat nfurmazion sun la biodiversità y nsci sensibilisà sun argumënc ambientei.
L Museum Natura a Bulsan y l Ufize provinziel parcs naturei mët a jì l di dla biodiversità tulan su n’idea de na scumenciadiva nasciuda dl 1999 dala revista tudëscia “Geo”.
Pra l’azion sun i prei de Armentara fajerà pera de plu tuadëures da dut l Sudtirol y dal’Austria. L unirà jit tres n raion a n’autëza danter 1750 y 2100 metri cun prei, pastures, lec, bosch de zimres, pëc y leresc, ruves y sambën crëp dolomitich. I resultac scientifics dl’azion unirà publichei sun la revista “Gredleriana”, la publicazion scientifica spezialiseda dl Museum Natura dl Sudtirol.
Ntan l di dl biodiversità vëniel nce pità doi jites naturalistiches menedes da esperc. L ne ie nia de bujën de se scrì ite, l tleca se prejenté al pont de ancunteda.
Per la jita ornitologica tl raion de Armentara cun Arnold Rinner se anconten dala 8 da duman sun la plaza dai auti sëura Furnacia a La Val. L ie udù dant de unì de reviers per mesdì. L’autra jita naturalistica unirà meneda da Alfred Erardi. Per chësta jita se anconten dala 14.00 pra la plaza dai auti sëura Furnacia a La Val. Per chësta jita iel udù dat de unì de reviers per la sies da sëira.
La pert finela dl Di dla biodiversità 2013 sarà la prejentazion di resultac scientifics dl di ai media. Chësta cunferënza stampa unirà tenida dala 18.30 tl self dles manifestaziuns “Domëne Moling”, daujin ala dlieja da La Val. (USP)
---
I culaburadëures media che uel fé fotos o fé registrazions cun ntervistes, possa tò su cuntat cun Thomas Wilhalm dl Museum Natura ai numeri 0471 412971 o 349 5644742.
as
Galaria dales fotografies
