Atualità

Economia | 01.07.2013 | 14:41

L fond per sustenì l export possa scumencé

Na pert dëibla dl’economia dl Sudtirol ie l vënder di prudoc oradecà. Per ti judé ala firmes tl export, à la Jonta provinziela metù su n fond dl export che juda sce l vën a mancë paiamënc. Chësc fond ie (NCUEI) ai prim de lugio unì dat pro dala Jonta provinziela y nsci possel unì nvià via cuncorsc y acurdanzes.

Tl Trentin vën 23 percënt di prudoc vendui oradecà, chësta cuota dl export ie tl Tirol danter 35 y 45 percënt, me tl Sudtirol iela ntëur i 19 percënt. "Tlo iel de bujën de fé velch y perchël ulons ti judé ala firmes cun pruvedimënc per l export" à dit l presidënt Durnwalder do la senteda dla Jonta provinziela.

Un di pruvedimënc zentrei per ti dé na sburdla al export ie bel unì dat pro dala Jonta provinziela: l cunzet per l fond dl export cun i cuncorsc y l'acurdanzes che toca leprò. L fond dl export ie na garanzia de paiamënt, che vën a valëi sce l passa massa tëmp danter l apusté y l ultimo paiamënt.

L fond unirà ciarià cun cin milion de euro. Chisc scioldi unirà sëurandai a na banca da tlo che vënc l cuncors. Sëuraprò vëniel tenì sun na pert 70 milion de euro sciche garanzia. Chisc scioldi de garanzia vën dala Südtirol Finance. "Chësc uel di che cin milion de euro passa dala Südtirol Finance a n'autra banca y che 70 milion de euro resta pra la Südtirol Finance, zënza che i possa unì adurvei per velch d'auter, ma che porta fic" spiega l assessëur Widmann.

Referimënt per firmes che ulëssa pudëi se lascé sun l fond dl export, ie la repartizions provinzieles per l'economia y l'urganisazion per l export EOS pra la Camera de Cumerz. La firmes manderà ite na dumanda che unirà data inant ala banca nciarieda. Chësta dajerà pona n arat n cont dla garanzia de export. La banca muessa te chësc cajo lauré deberieda cun n partner de cooperazion che sa nëut tl ciamp dl export. Bonamënter sarà chësc partner la banca de cuntrol austriaca ÖKB.

La dezijion sun la garanzia che unirà data, unirà tëuta dal cunsëi de export aldò dl arat dl partner de cooperazion. Te chësc cunsëi de export saral nce la repartizion provinziela per l'economia, la EOS y la Südtirol Finance. Te cunsëi, ma zënza dërt de vela, saral nce la banca da tlo.

Sce a na firma ti vën a mancë paiamënc dl export, possela jì da si banca che se lascerà pona mandé i scioldi dala banca de finanziamënt. Chësta arà dopro l duvier de jì oradecà a se tò i paiamënc che mancia.