Atualità
Premier Letta y l presidënt Durnwalder à sotscrì n’acurdanza per ngrandì l’Autonomia
L’acurdanza sotscrita (NSNUET), ai 5 de agost a Bulsan dal presidënt di ministri Enrico Letta ie aldò de Durnwalder n sëni de crëta per na pitla realtà. La mostra su la streda dla culaburazion danter Bulsan y Roma, metan dant obietives per n tëmp plu curt y n tëmp mesan: dala cumiscions per l’autonomia nchin a na regulamentazion nueva dla finanzes.
L’acurdanza sotscrita tl Palaz Widmann a Bulsan da pert de Durnwalder y Letta ie n program de lëur te chël che l Guviern Talian y la Provinzia se mpënia de ti jì permez a de plu ponc ntan i proscimi mënsc y de abiné soluzions a problems che la Jonta provinziela à sentì mo de plu do l Guviern Monti.
Te n tëmp plu curt se tratela de numiné la Cumiscions di Sies y di Dodesc, tl medemo tëmp dëssel nce unì tratà argumënc de urbanistica, danter chisc na regulamentazion sciorfa per vënder prudoc a detail ti raions de produzion. A chësta regulamentazion provinziela ti ova l guviern da dant fat recurs mo dan la Chëurt costituzionela.
Danter i problems per chëi che l ie prësc da abiné na soluzion iel nce la chëuta sun la puscions IMU. Tl’acurdanza iel udù dant de valuté la puscibltà de ti lascé defin ai chemuns l’entredes dl IMU tl Sudtirol y tl Trentino. Nce l parch naturel dl Stelvio ie nunzià danter la cuestions da ressolver prësc: l dëssa unì aministrà dala Provinzies. “Ne ulon nia desdrù l’unità dl parch, ulon nes cruzië de pudëi aministré nosta pert cun efiziënza” à dit l presidënt dla Provinzia.
Te n tëmp mesan dëssel unì metù mpé l finanziamënt dl’Autonomia. Chësc uel di che l’Acurdanza de Milan unirà adateda. L pont zentrel ie che la Provinzia ie anjenieda a dé si cuntribut, ma ulà che l vën sparanià, unirà fat ora dal’Aministrazion provinziela. L’acurdanza de Bulsan porta de chësc viers. Bele n mierculdi uniral metù man te chëla che na grupa de lëur se ancunterà per l prim iede per anjenië la fundamëntes per na regulamentazion nueva per la finanzes danter Stat y Provinzia.
L presidënt dla Provinzia Durnwalder à laudà l premier Letta sciche na persona che lascia rujené i fac. “Ël nes à mei mpermetù miraculi, ma l ti ie jit permez a nosc bujëns cun gran scerietà” nsci l presidënt. Per Durnwalder ie chësc nce na recunescënza particulera per l Sudtirol. “Chësta acurdanza ie esprescion de n tlima nuef de culaburazion danter Bulsan y Roma, da chël che se aspiton tlermënter che l tën.”
L presidënt di ministri Letta, avisa l 100 esim di de si ncëria, à dit che l ti stajova a cuer a mantenì tant che l ti ova mpermetù a Sudtirol. I prim vares cuncrec ie bele unic fai ntan l’enes passedes, danter chisc – nsci Letta - nce l’acurdanza per la toponomastica: “Chësta acurdanza à mustrà che ulon ti dé forma al daunì tres l dialogh, mpede se mpunté sun cie che ie stat” à dit l presidënt di ministri mpermetan si mpëni persunel per la regulamentazion nueva dla finanzes. L’acurdanza ie a uni maniera n bon pont per muever y n sëni mpurtant per tant che l guviern ie bon de realisé. “Possi seguré che nia respeté l’Autonomia, ne ie nia mi vester y che son drët da lonc da velch da de tel” à dit Letta a Bulsan.
Fotos dla vijita dl premier Letta y dl minister Delrio cun sotscrizion dl'Aurdanza, tl palaz Widman a Bulsan ie da udëi tlo.
as
Galaria dales fotografies
