Atualità
La fibra otica ie ruveda a Al Plan (cun AUDIO y VIDEO)
L internet aslune à arjont Al Plan de Mareo. Te na culaburazion danter Provinzia, RAS y la sozietà dla furnadoies de Al Plan iel stat mesun ruvé cun i cabli de fibra otica nchin pra la zentrela dal telefonn. La Telecom à bele fat si pert di lëures y te diesc dis puderala dé ora i cuntrac. L taché ite de Al Plan ala rë de internet aslune ie unì prejentà (NCUEI) ai 6 de agost dal assessëur Florian Mussner.
Nchinamò fova Al Plan tacà ite al internet tres culegamënc che n possa paredlé a n troi da mont. “Cun l culegamënt de fibra otica ons śën culegamënc che n possa paredlé a n’autostreda” à dit l assessëur Mussner pra la prejentazion tla cësa de chemun. Chësc ie stat mesun realisé ajache de plu pertes à tenì adum y à laurà pea: tres la RAS fova l culegamënt de internet aslune bele unì anjenià nchin sun Plan de Corones. La furadoies de Al Plan se à metù a desposizion per tre i cabli nchin ju a Al Plan. Da pert dla Provinzia à l Assessorat ai lëures publics coordinà i lëures y sëurandat l culegamënt ala Telecom. Chësta sozietà dal telefonn à bele anjenià i aparac tla zentrela de Al Plan per pudëi spartì l internet aslune se nuzan di cabli dal telefonn che ie bele. “I regulamënc se damanda che la Telecom publicheie la dispunibltà dl internet aslune y perchël possela permò tache ite la prima cëses ai 26 de agost” à spiegà l ing. Marco Springhetti, respunsabl tecnich per l internet aslune da pert dla Provinzia.
La Provinzia ie tl lëur de finé l culegamënt de fibra otica da Longega a Al Plan per pudëi a chësta maniera stlù n anel, y pité na garanzia sëuraprò per l internet a Al Plan. Tres i cabli dal telefonn de ram va l internet, aldò dla destanza dala zentrela, cun n slune de 7 nchin a 20 Mb/s. “Plu de 20 mega ne adrova nianca n hotel, propi me na majera firma che lëura truep cun videocuferënzes” à spiegà Karl Manfredi dla Brennercom.
Ma la Provinzia se à tëut dant velch de plu: la meterà i culegamënc de fibra otica nchin pra la strutures publiches. Davia che la lege ne l lascia nia pro, ne puderala nia mëter la fibres otiches nchin pra la cëses privates. Per l mumënt ne iel nianca de bujën, ma n uel nce vester anjenië per l daunì y per la majera firmes. Per chësta rejon ie i chemuns damandei de lauré ora n masterplan che mostra su la situazion a livel de chemun n cont gropes de spartizion, roles ulache n pudëssa tré tres cabli, custimënc y program de lëur. L Chemun de Mareo ie te na situazion particulera cun frazions destachedes dal zënter. “Te chësc cajo speziel cialons de judé l chemun a purté la fibra otica nchin tla frazions de Rina y de La Pli” à dit l assessëur Mussner.
I culegamënc de fibra otica dedora dai chemuns ie de gran utl ajache la rë tënie nce canche l iede plu che se la nuzea. “I cabli che vën da Longega ie à 144 fibres, nce sce l internet passa nce tres doves. La Provinzia possa fité de chësta fibres a de plu firmes dal telefonn y chëstes à bele damandà la despunibltà” à spiegà l ing. Springhetti. L assessëur Mussner à metù a cuer che sce la fibra otica vën nce nuzeda dal rë de fonins, saral nce da manco radiazions.
I lëures per purté l internet aslune nce ti autri chemuns dal Val Badia ie bele a n bon pont. Majera pert dla proietazions ie stlutes ju, l finanziamënt segurà y i lëures sëurandai. Riesc doi la sajon auta uniral metù ju la roles da Longega a Piculin te na culaburazion cun la Furestela. La proscima tapes sarà Badia, Longiarü, Rina, Anermoia, La Val y Corvara. “Tenian cont de i lëures realisei nchinamò pudons di che nchin ala fin dl 2013 sarons boni de arjonjer duc i chemuns dla Val Badia cun la fibra otica” à segurà Mussner. (USP)
as
Galaria dales fotografies
Internet aslune nchin a Al Plan
Mussner: aiuc dala Provinzia per la frazions plu destachedes
- Scarica il file audio 1141 kb
Mussner: na bona situazin provvisoria tla Val Badia
- Scarica il file audio 447 kb
Mussner: gran culaburazion per l internet a Al Plan
- Scarica il file audio 435 kb
