Atualità
Dër aprijé le sorvisc de autobus tl Parch natural Fanes-Senes-Braies
Ti ultimi cin agn à le Parch natural Fanes-Senes-Braies albü n svilup che po rapresentè n ejëmpl paradigmatich de valorisaziun teritoriala sostenibla. N dat important: l’oferta dl trasport publich danter Al Plan y Pederü dl 2008 é gnü cin iadi maiù - acompagnada da n svilup contestual dla domanda. Assessur Widmann "Colià svilup turistich y mobilité che tëgn cunt dl ambiënt".
Ti ultimi cin agn à le Parch natural Fanes-Senes-Braies albü n svilup che po rapresentè n ejëmpl paradigmatich de valorisaziun teritoriala sostenibla. N dat important: l’oferta dl trasport publich danter Al Plan y Pederü dl 2008 é gnü cin iadi maiù - acompagnada da n svilup contestual dla domanda.
„Chësta esperiënza desmostra che le svilup economich, la creaziun de posć de laûr y l'adoranza responsabla dl ambiënt y dla contrada po jì a öna", dij l'assessur Widmann. "N bojëgn che ne po nia gnì sburlé, dantadöt te n raiun sciöche chël dl Südtirol, olache la natöra alda pro les majeres ressurses".
La desfida é gnüda tuta sö dal Departimënt por la mobilité provinziala y dai responsabli dl turism y dl'aministraziun locala a Al Plan. D’isté dl 2008 jô l’autobus trëi iadi a Pederü – al dedaincö val 17 iadi ite y fora al dé. „Le sorvisc de linia é gnü amplié vigni ann, y adöm cun l'oferta y l'introduziun dl daz por i auti, él inće chersciü dassënn le numer di utënć", cunta Widmann.
N gran aflus de passajiers vëgn registré inće danter Al Plan y Furćia, olache l’autobus passa vigni ora dal'isté dl 2013. Inće sce l’oferta é śëgn dui iadi tan co dl 2012, n’él sovënz nia assà lerch.
Le suzès dl sorvisc de autobus che coliëia Brückele y Plätzwiese ne n’é nia da manco. "Inće por mirit dla strada stlüta portada ite dal comun cun gran suzès", spliga Widmann. I bus pëia ia vigni 20 menüć y sce al va debojëgn nen val deplü. Porimpò éson sovënz al lim dla capazité.
"La mobilité che tëgn cunt dl ambiënt se respidlëia tl spirit dl tëmp: che che va en vacanza incö à vëia de natöra y trancuilité; le turism sportif y la sanité à n suzès tres majer. Les porsones lascia plü ion chit l’auto y s’anüza de ofertes alternatives sce ares é danman. Chësc svilup vëgn raforzè inće dal'oferta dles chertes turistiches che conzed da s’anuzé dl trasport publich y de ofertes locales a prisc pausciai y cun na sòra cherta – chësc é le caje dla Summercard a Al Plan" dij Widmann.
Mo an n’ô nia s’archité chilò: bele dan da n ann cunta Widmann él gnü analisé la fatibilité tecnica de n coliamënt cun i autobus eletrics a Al Plan, Plätzwiese y le raiun dl Sciliar. Por mirit di svilups aslöms dla tecnologia podess le proiet se trasformè tosc te realtè stlüj jö l’assessur. (USP)
usp
Galaria dales fotografies
Foto: Repartizion Mubilità
