Frabiché | 30.08.2013 | 10:32

Surandada scora alberghiera nöia a Bornech (cun audio)

Incër 500 scolars y 220 insegnanć y le personal aministratif po jì ite la proscima edema tla sënta nöia dla scora alberghiera a Bornech. Le presidënt dla Provinzia Luis Durnwalder, l’assessur por i laûrs publics Florian Mussner y l’assessuria por la formaziun Sabina Kasslatter Mur ti à surandè (INIER), ai 29 d’agost la tle dla frabica scolastica nöia ai anuzadus.

„Sce i formun bun la jonëza che manajarà daldô nosta provinzia, dailò ti Junse adincuntra a n dagnì sigü; por le fà ùnse debojëgn de strotöres modernes y de personal insegnant motivé y competënt", à dit Durnwalder pro la surandada dla scora nöia. La scora nöia dess ester n post d'incuntada y n zënter inteletual por le turism, insciö le presidënt dla Provinzia.

„Cun la scora nöia ùnse realisé n gran proiet por la formaziun y insciö por le dagnì", à sotrissé l'assessur por i laûrs publics Mussner. Aladô de Mussner é le frabicat gnü proietè internamënter por sparagné ressurses por d'atri proieć. „Da fà la scora él feter ma gnü tut firmes da chilò y i orun tó inant firmes dl post da na gran cualité", à dit l'assessur provinzial.

L'assessuria por la formaziun Sabina Kasslatter Mur à dit che i mituns y la jonëza ne passa ignó tan de tëmp co a scora y porchël ne mësson nia ma arjigné ca locai adatà, inće acompagné i scolars. Cun le frabicat nü s'alza dessigü inćë le suzès de formaziun di scolars.

La scora é importanta por Puster, ajache chësta valada à tl ćiamp dl turism cun 7,5 -8 miliuns al ann le majer numer de pernotamënć tl Südtirol. I 500 scolars rapresentëia dër bun le Südtirol tl ćiamp dl turism cun competënza, cordialité y ospitalité, à dit l'ombolt Christian Tschurtschenthaler.

Sciöche l'architët Andrea Sega à splighé, é la scora gnüda fata sö te n tëmp record de 23 mëisc. Les döes perts nöies dla strotöra nöia cun cater alzades sura tera à adöm cun la cubatöra sot tera n volum de indöt 41.639 metri cubics y al va ite 15 tlasses, sciöche inćë dui locai por i compiutri, na biblioteca, n restaurant, n bar, n salf da mangé, n local da fà pratica, na ćiasadafüch da desmostraziun, na ćiasadafüch da imparè y na reception, sciöche inće na garage sot tera da 41 posć.

Tla ćiasa di studënć che gnarà rovada de novëmber dl 2013 y olache an podarà jì ite dl 2014, él preodü 61 ćiamenes cun 117 leć. Implü él te chësc frabicat na mensa nöia cun 96 posć. I cosć por le frabicat, cun laprò l'aredamënt é de incër 26 miliuns de euro.

Avisa adaldërt por le scomenciamënt dla scora ti à le presidënt dla Provinzia Luis Durnwalder, l'assessur provinzial Florian Mussner y l'assessuria por la formaziun Sabina Kasslatter surandè la tle por la frabica scolastica nöia al diretur Sigfried Steinmair. Bele l'edema che vëgn po i scolars imparè y se eserzité tla scora nöia.

usp

Galaria dales fotografies

Surandada dla tle por la scora alberghiera nöia a Bornech (d.m.c.): l’assessuria Kasslatter Mur, le presidënt dla Provinzia Durnwalder, le diretur Steinmair, l’ombolt Tschurtschenthaler y l’assessur provinzial Mussner

Le presidënt Durnwalder, le diretur de repartiziun Sega, le diretur de departimënt March, i assessurs provinziai Mussner y Kasslatter Mur, l’ombolt Tschurtschenthaler y le diretur Steinmair
(foto: USP/Pertl).