Atualità
Giaurì la segonda edizion dl Innovation Festival
Cun l moto „Weitblick/Ampie vedute“ vëniel a Bulsan pità la segonda edizion dl fetival dl inuvazion dedicà ala mont, la cumenanza y la tecnologia. Te 34 ëura de program per la scoles, 35 ëura de workshops y cunvënies, te 70 manifestazions cun 140 reladëures da diesc nazions, vëniel pità na vijion ampla. L festival ie unì giaurì (NCUEI) ai 26 de setëmber.
Se stizan sun l suzes dla prima edizion cun 25.000 vijitadëures, se tratela tla segonda edizion dl Innovation Festival dl svilup che tën tl tëmp fajan referimënt a raions da mont. “I tëmps se muda, perchël muessa nce n raion sciche l nost se mudé cun i tëmps, sce ne ulon nia resté fërmes”, nsci l presidënt dla Provinzia Luis Durnwalder. Cun l festival uelen tré ite la jënt tl prozes de inuvazion y ti fé udëi ite la mpurtanza dla tueda y svilup: “Chësta ie la sëula streda che ti mpermët a nosc jëuni mestieres de majera cualificazion”, nsci Durnwalder. Vester inuvatives, uel a chësta maniera di de dé n daunì a jëuni, à metù a cuer l Presidënt dla Provinzia.
Deberieda cun n gran program (da abiné a www.innovationfestival.bz.it) prejënta la segonda edizion dl festival de plu nuviteies. Per l prim iede ie unì anjenià na APP dl festival che ne costa nia a desciaië dala plata web dl Innovation Festival, sibe per Android che nce Apple iOS. Leprò pieta l festival Hotspots-WiFi te duta Bulsan, tres chëi che n possa jì gratis tl internet. Chi che ne possa nia vester leprò pra i avenimënc zentrei dl festival, possa ti cialé tres streaming sun la plata web o sun na majera tëila sun plaza Walther.
N majer pëis ti vëniel chëst ann nce dat ai talënc jëuni: “Cun la plataforma 89plus y na lingia de scumenciadives anjeniedes per start-ups, vëniel bele dat na udleda a daunì de nosc jëuni” à metù a cuer l assessëur provinziel per l’inuvazion pra la giaurida dl festival tl Museion a Bulsan. “La se trata de nes seguré na bona luegia da muever, da chëla che pudon muever mo plu debota che d’autri, te chël mumënt che la plata dl’economia globala se muda” à dit l assessëur sorissa che l svilup y l bënsté dependerà tl daunì mo de plu dala ideies.
Bele l prim di dl festival vëniel pità ucajions spezieles cun Alberto Tomba,Thomas Sykora, Michael Renner, Simone Moro y Ron Dembo. N vënderdi puderan scuté su referënc sciche Philippe Daverio, Jessica Jackley y Hitendra Patel, ntan che n sada aspieten la ministra Maria Chiara Carrozza, Klaus Töpfer y Carlo Ratti.
Dut l program dl festival ie publicà sun www.innovationfestival.bz.it. Leprò iel unì anjenià i canai de nfurmazion sun twitter (@innofestBZ; #innofestbz), Facebook (www.facebook.com/InnovationFestivalBz) y Youtube (www.youtube.com/InnovationFestivalbz).
as
