Atualità
Ros por l’internet aslöm arjignà ćina a Picolin
Le rëi de coliamënć por l’internet aslöm tla Val Badia va inant n vare al iade. Chisc dis vëgnel stlüt jö i laûrs sön le tòch danter Longega y Picolin. I ros por l’internet aslöm sön chësc tòch é gnüs realisà te na colaboraziun straordinara danter l’Assessorat ai Laûrs publics y l’Ispetorat forestal da Bornech.
Por arjunje Picolin y l’Alta Val Badia cun les fires otiches vëgnel adorè la strada forestala che é inće strada dales rodes. Chësc isté à l’Ispetorat forestal da Bornech fat mioramënć sön la strada forestala che ê bele por podëi inće l’adorè plü saurì cun la roda. N tòch de feter 500 metri é propi gnü fat danü. Sön la medema trassa êl inće preodü da passè cun i coliamënć dl internet aslöm. “Impede fà la strada y mëte jö i ros por les fires otiches te dui laûrs, unse podü fà döt te n iade. Tres chësta colaboraziun cun la Forestala él stè poscibl da stlüje jö tramidui i laûrs te n tëmp plü cört” spliga l’assessur provinzial por i laûrs publics.
La strada forestala y dales rodes danter danter Longega y Picolin é feter de 5 chilometri, y passa tres le bosch, presciapüch 50 metri sura la strada provinziala. La realisaziun de chisc laûrs n’é nia stada tan scëmpla deache le raiun é dër ërt y al é tecnicamënter ri da laurè. Por la pert che reverda i ros por l’internet aslöm à la Provinzia fat n investimënt de 225.000 euro. Döt le laûr cun i ros y la strada é gnüs a costè indöt presciapüch 400.000 euro.
Deache sön le tòch de strada danter Picolin y La Ila éson bele tl laûr da mëte jö i ros por l’internet aslöm, podaràl tratan les proscimes edemes gnì trat tres i cabli de fira otica sön la pert che manćia ćiamò da Longega ćina sö La Ila. Spo gnaràl ćiamò lauré da pert dla Provinzia por tachè ite inće i paîsc da na pert fora, sciöche Rina, Antermëia, Longiarü y La Val ala rëi dl internet aslöm por ti garantì de mius coliamënć digitai cun döt le monn. (USP)
as
