Atualità
La zedula per lité l Cunsëi provinziel
N dumënia che vën vëniel lità l Cunsëi provinziel nuef, ma bele śën possen udëi co che cëla ora la zedula de vela che i zitadins giaterà ai 27 de utober. Sun la zedula iel i simboi dla 14 listes y cater risses uetes per la stimes de preferënza. Ti luesc ladins uniral spartì ora na zedula scrita tla trëi rujenedes.
Per la regulamentazion dla veles dl Cunsëi provinziel ie na lege nueva, ma n cont dl zedula da lité ne iel deguna mudazions. Per i luesc ladins iel unì anjenià na zedula cun la scrites tla trëi rujenedes tudësch, talian y ladin.
Uni un che jirà a lité giaterà na zedula cun i simboi dla 14 listes. Sun la pert a man ciancia ie i simboi di Comunisć dl Sudtirol, Unitalia, SVP, Rifondazione Comunista, Süd-Tiroler Freiheit, i Vërc y Scelta Civica per l'Alto Adige. Sun la pert a man drëta la zedula iel i simboi de Forza Alto Adige - Lega Nord - Team Autonomie, L'Alto Adige nel cuore, La Destra Minniti, PD, Freiheitlichen, Ladins Dolomites - Bürgerunion - Wir Südtiroler y dl Movimento 5 Stelle. Uni litadëur possa lité na sëula lista, fajan na crëusc sun l simbol.
Per la lites provinziela à uni litadëur sëuraprò la puscibltà de dé nchin a cater stimes de preferënza. Perchël iel sun la pert zentrela dla zedula cater risses uetes. Sun uni rissa possen scrì l inuem de n candidat de chëla lista che n à lità cun la crëusc sun l simbol. De norma basta scrì via l cuinuem, ma per schivé fai, dëssen nce scrì l inuem de batëisum. N alternativa possen nce scrì via l numer dla posizion dl candidat sun lista.
Ala lites provinzieles iel lascià pro 424 candidac. Si inuemes ie publichei sun la plates web che pieta nce duta la nfurmazions un la veles provinzieles tla rujeneda ladina (http://lites.provinzia.bz.it/). Nuviteis vën nce dates inant tres facebook (landtagswahlen.2013.elezioniprovinciali) y twitter (@stwahl13; #st13).
as
