Atualità
Strategia per n’acurdanza finanziera cun l Stat
La strategia de Bulsan per ruvé a n’acurdanza finanziera nueva cun l Stat, ie (NCUEI) ai 28 de utober unida data pro dala Jonta provinziela. Aldò de chësta strategia ne dëssa la Provinzia de Bulsan ne nia me plu giape l 90 percënt dla chëutes che vën paiedes ite tl Sudtirol, ma l 100 percënt. Da pert de Bulsan unissel perchël sëurantëut dut l custimënt che l Stat à tl Sudtirol.
Ntan i lëures per ruvé dal'Acurdanza de Milan a n'acurdanza nueva a Bulsan, à la Jonta provinziela mo n iede dat pro che tla tratatives cun Roma dëssel unì dat pëis a plu lidëza tla gestion dla chëutes y co adurvé i scioldi dla chëutes. "Chësc uel di che ulon aministré duta la chëutes che vën tëutes ite tl Sudtirol" à dit l presidënt dla Provinzia Luis Durnwalder do la senteda dla Jonta provinziela. Nchiamò ti spitova ala Provinzia de Bulsan l 90 percënt dla ntredes. Per valivé ora i scioldi sëuraprò, uel la Provinzia ti unì ancontra al Stat per pudëi ressané si finanzes: "Son desposć a purté duta la spëises che vën a se l dé tl Sudtirol per l Stat", à dit Drunwalder.
L cont cëla ora nscila: l 10 percënt dla chëutes dl Sudtirol che ti resta al Stat fej ora 380 milion de euro, l custimënt dl Stat tl Sudtirol ie de 520 milion de euro. "A chësta maniera ruvëssen sun na defrënza de 140 milion che messan ti mëter a desposizion dl Stat", à spiegà l Presidënt dla Provinzia. Chësc custimënt iesen anjeniei a sëurantò, davia che l'acurdanza nueva dëssa ti dé plu lidëza de muvimënt ala Provinzia, te cëla che l ne fossa nia plu da tenì ite l pat de stabilità y che l Stat ne pudëssa nia plu se tenì scioldi che ti spieta a Bulsan. "Chësta fossa na bona soluzion" à dit Durnwalder.
Tl medemo mumënt uel la Provinzia ti jì permez a na regulamentazion dla chëutes spezieles, che dassëssa ti jì per ntier al Stat. "Na tel regulamentazion ie me da azeté, sce i scioldi de na chëuta speziela vën nce liei a n custimënt cuncret. Me per ressané la casses dl Stat, ie massa puech", nsci l Presidënt dla Provinzia.
La Jonta provinziela à nce fat ora de nvië via tratatives cun l Trentino, a na maniera da arjonjer n balanz finanzier. Nce te chësc cajo iel unì dat la ncëria de mené tratatives.
Te cunferënza stampa à Durnwalder nce numinà l bujën de ruvé a n'acurdanza per i aiuc finanzieres ai chemuns ujins tla provinzia de Belun. (USP)
as
