Atualità
Junta provinziala nöia: lité le grup dl Presidënt dla Provinzia Kompatscher
USP - Le Südtirol à na Junta provinziala nöia. Incö domisdé (ai 16 de jenà) à le Consëi provinzial lité le grup de govern proponü dal Presidënt dla Provinzia de Balsan Arno Kompatscher. La Junta provinziala nöia é metüda adöm dal presidënt dla Provinzia, döes assessuries y cin assessurs.
Danmisdé ti à le Presidënt dla Provinzia Kompatscher presentè al Consëi o grup de govern y ti à portè dant sön la basa de ći reflesciuns che les competënzes é gnüdes partides sö. Do la discusciun él gnü lité domisdé la Junta provinziala, a chësta moda él da incö inant na Junta provinziala nöia cun competënzes nöies.
A će de chësc grup él le Presidënt dla Provinzia Arno Kompatscher, che surantol inće l'inćiaria de assessur por l'economia, les finanzes, l'inovaziun y les relaziuns cun foradecà. Chësc ô dì che so departimënt tolarà ite le comerz, l'artejanat, le turism, i sorvisc, l'industria, i apalć, les infrastrotöres, les finanzes, l'université y l'inrescida, la direziun generala.
Sciöche pröm vizepresidënt él gnü lité Christian Tommasini, che se crüzia inant dla scora y cultura taliana y dl frabiché abitatif y ciafa laprò les cooperatives, i laûrs publics, le liber fondiar y le cataster. Sciöche secundo vizepresidënt él gnü lité Richard Theiner. Pro so assessorat "Ambiënt y energia" tóchel l'urbanistica, la sconanza dl ambiënt y dla contrada, l'agenzia por l'ambiënt, l'ega y l'energia.
Arnold Schuler devënta assessur por l'agricoltöra y i bosć (cun laprò la sperimentaziun agrara y forestala), la proteziun zivila (cun laprò les costruziuns idrauliches) y i comuns, Martha Stocker devënta assessuria por le "Bëgnester" che tol ite la sanité, le sport, les politiches soziales y le laûr. Les competënzes dl assessur Philipp Achammer tol ite la scora y cultura todëscia (cun laprò la formaziun profescionala), sciöche inće l'integraziun. L'assessur Florian Mussner, mantëgn inant la scora y la cultura ladina, le patrimone, la manutenziun frabiches y le sorvisc strades y ciafa laprò la mobilité, i museums y i bëgns culturai. Waltraud Deeg devënta l'assessuria por la "Familia y l'organisaziun dl'aministraziun" che tol ite la familia, l'organisaziun dl'aministraziun publica, le personal, la scemplificaziun dles prozedöres y l'informatica.USP
