Atualità
Congrès de musiga popolara chësc isté a Porsenù – Iscriziuns davertes ćina ai 15 de mà
USP - Les scores de musiga dla Repartiziun Cultura todëscia y la Facolté de Sciënzes dla formaziun dla Université da Balsan inviëia adöm al ofize Inovaziun y consulënza dla Provinzia de Balsan düć i studënć y dötes les studëntes, maestri y maestres dla scolina, le personal insegnant y esperć dl setur al congrès „Volksmusik macht Schule“ („Musiga popolara fej scora“) dai 26 ai 28 de agost dl 2014 a Porsenù. Les iscriziuns é bele davertes y an po se scrì ite ćina ai 15 de mà.
La musiga popolara rapresentëia al dedaincö öna dles espresciuns artistiches plü tradizionales, inće tles valades ladines. Ara é öna dles formes musicales plü praticades te nosta sozieté y porta pro insciö inće al mantignimënt dles tradiziuns musicales tl tëmp. La musiga popolara é por tröc na pasciun por döta la vita che à metü man inće bele da pici insö.
Insciö vëgnel organisé por les porsones apascionades de musiga popolara chësc isté na incuntada de trëi dis cun n grup de esperć a Porsenù tla Université da Balsan. Le congrès „Volkmusik macht Schule" vëgn metü a jì dala Facolté de Sciënzes dla formaziun y dales scores de musiga todësces y ladines en colaboraziun cun l'ofize Inovaziun y consulënza. Le fin de chësta incuntada é da fà vire ai partezipanć la gran varieté dles espresciuns stromentales y vocales dla musiga popolara.
Tratan la manifestaziun él preodü döes formes de discusciun: tles sentades cun düć i partezipanć gnaràl tratè chestiuns fondamentales dla musiga popolara y tles incuntades de grup gnaràl aprofondì aspeć che reverda la pert stromentala y vocala dla musiga y dl bal popolar.
Les iscriziuns é davertes da śëgn inant y an po se scrì ite ćina ai 15 de mà. Tl plan provinzial por i cursc de ajornamënt por les scolines y les scores 2013/2014 à chësta manifestaziun le numer de curs 43.06.
Informaziuns:
rc
