Atualità
Aniversar: 40 agn de contrać cun les emitënzes publiches de radio y televijiun
USP - Incö, vëndres ai 25 d’aurì, él gnü festejé a Balsan l’aniversar de 40 agn da canche al é gnü sotescrit i contrać cun les emitënzes publiches dla televijiun y dl radio dl’Austria, di Paîsc Todësc y dla Svizera. I contrać dl 1974 é la fondamënta iuridica por che an pois odëi y ascutè al dedaincö tl Südtirol i programs dl ARD, ZDF, SRG y ORF. Chësc gran avenimënt y iubileum é gnü festejé incö a Balsan.
N gröm de rapresentanć dla politica y di massmedia, danter l'ater i presidënć dles juntes provinziales dl Südtirol y Tirol, Arno Kompatscher y Günther Platter, s'à incuntè incö tl palaz Mercantil a Balsan por recordè l'importanza dla difujiun di programs dl ARD, ZDF, SRG y ORF tl Südtirol. "Al dedaincö ne podunse gnanca se imaginé l'importanza che chisc contrać à albü y à ćiamò tres por nos", dij le presidënt dla Provinzia Arno Kompatscher.
A chësta manira à la popolaziun dl Südtirol albü azès tla vita da vigni dé à plü alternatives mediatiches, na oferta che à portè inant l'evoluziun linguistica y culturala di grups linguistics todësc y ladins. "L'ampliamënt dla oferta di programs radiofonics y televisifs à inće portè a n arichimënt cultural tla popolaziun ladina y te döt le Südtirol", recorda l´assessur ladin Florian Mussner.
I contrać, che é gnüs stlüć jö dan da 40 agn à süa legitimaziun te na norma d'atuaziun dl Statut d'autonomia dl ann 1973 y ai é inće la fondamënta por l'ënt publich dl radio y dla televijiun dl Südtirol (RAS), che é gnü istituì n ann do la stipulaziun di contrać dl 1974. La inćiaria dla RAS é da garantì la rezeziun di programs radiofonics y televisifs dl ORF, ARD, ZDF y SRG te döt le Südtirol; al momënt vegnël trasmetü indöt 18 programs televisifs y 20 programs radiofonics.
rc
Galaria dales fotografies
