Atualità
Dezijiun dla Junta Provinziala: 10 miliuns extra por la manutenziun sön les strades
La Junta Provinziala de Balsan à aprovè incö, ai 29 de aurì dl 2014, 10 miliuns de euro por la manuteziun dles strades. L`invernn lunch y cun tröpa nëi de chësc ann à portè ala deziijiun dla junta provinziala de aumenté i scioldi por i laûrs sön les strades.
"La tröpa nëi n'à nia ma porté a problems de viabilité tratan l' invern, mo sëgn él porchël inće da fà tröć laurs por sistemé y asfaltè le strades, dandaldöt sön i jus" spliga l'assessur ala mobilitè Florian Mussner incö tratan la conferënza stampa do la sentada dla Junta Provinziala. Por podëi mantignì y asfaltè i toć de strades che à de bojëgn à la Junta dla Provinzia ratifiché 10 miliuns de euro da mëte laprò ai 7 miliuns bele aprovà por la manutenziun ordinaria dles strades. Le import de bilanz por la manutenziun dles strades é insciö de 17 miliuns de euro. "Indöt unse 2.700 chilometri de strades tl Südtirol da aministrè y por podëi sistemè un en chilometer de strada adorunse söporjö dai 80 ai 100 mile euro", dij Mussner. L´ufize por geologia dla provinzia colaborëia tl dagnì inće adöm ala Université de Ancona a en proiet por la realisaziun de n asfalt plü resistënt al ćialt y al frëit.
Implü á la Junta provinziala danter ater aprovè incö mosöres finanziares por podëi sostignì piceres botëghes tles periferies y te pićeres fraziuns comunales. I intervënć preodüs sarà stabilis da en grup de laûr söla basa de critêrs sciöche: la lontanaza da fraziuns abitades, la oferta de bëns ch'an adora vigni dé, medejines, oferta de informaziuns turistiches, botëghes cun na oferta de bëns desvalis. "L'import dl sostëgn finanziar sarà de indöt zirca 100.000 euro", dij Arno Kompatscher, presidënt dla junta provinziala.
rc
