Atualità
Tratatives Stat-Provinzia, EXPO 2015
Sentada dla Junta Provinziala ai 06 de mà dl 2014
USP - Deplü tematiches de profil general é stades debatüdes incö, mertesc 6 de mà dl 2014, tratan la sentada dla Junta dla Provinzia de Balsan. „I assessurs dla Provinzia à portè dant les tematiches plü amples y importantes de vigni assessortat, chësc por savëi ćiünes che é les prioritês de vigni assessorat ti proscimi trëi mëisc ", dij le Presidënt dla Junta Arno Kompatscher incö tla conferenza stampa do la sentada.
Öna dles tematiches plü importantes sarà proscimamënter les tratatives dla Provinzia cun le Stat talian por ći che reverda le contribut finanziar dla Provinzia al Stat por le ressanamënt dl debit publich. "Aladô dla "lege de stabilitè" unse tëmp da ćiafè na soluziun ćina la fin de jügn, i sperun de ester bugn da arjunje na convenziun cun le Stat por la fin de mà tratan la incuntada a Roma", insciö Kompatscher.
Secundo punt important che gnarà tratè i proscimi mëisc é la indunada europeica "Europatagung" a Ćiastel Prösels a Fie dai 4 ai 5 de messè dl 2014. Tema prinzipal é chilò le valur dles regiuns tl´Europa dl dagnì, sciöche al spliga l´presidënt de Junta: "N grup d'esperć porvarà da laurè fora la posiziun y l´importanza dles regiuns tla relaziun cun l´Europa. Al sará na discusciun nia ma scientifica mo inće politica, olache nosta situaziun tl Südtirol pò inće gnì tuta d´ejëmpl".
Inplü, tratan la sentada de Junta, él inće gnü portè dant y ilustré la presënza de Südtirol pro la "Expo 2015" a Milan. La coordinaziun dl proiet é gnüda afidada ala EOS (Organisaziun Export dl´Südtirol), che é gnüda inćiariada da realisè la presënza dl´"Südtirol-Stand" a Milan. "Por düć chi che oress to pert ala realisaziun dl proiet unse scrit fora na bandida de n concurs da ćiafè söla plata Internet dl EOS", dij Kompatscher. Por la presënza de Südtirol tratan l´EXPO él preodü na spëisa de indöt 2 miliuns de Euro, un en miliun él la provinzia che mët a disposiziun y le secundo sarà bunamënter curì da firmes y dites privates che orarà se prejentè al`Expo.
rc
