Atualità
Pröma sentada dla consulta nöia por la sconanza di consumadus
USP - Le program d´ativitè por le 2014, na incuntada por l´iubileum di 20 agn dla Zentrala di Consumadus dl Südtirol y na tuta de posiziun por ći che reverda l´acordanza comerziala”transatlantica” é stades les tematiches prinzipales tratan la pröma sentada dla consulta nöia por la sconanza di consumadus, a chëra che inće le Presidënt dla Provinzia, Arno Kompatscher, à tut pert.
La pröma sentada dla consulta nöia por la sconanza dles consumadësses y di consumadus é gnüda inaugurada incö, lönesc ai 12 de mà, cun n salüt da pert dl Presidënt dla Provinzia Arno Kompatscher, che à inće recordè le ćiamp de laûr atribuì ala consulta: formada da cater rapresentanc dla Zentrala di Consumadus y da cater rapresentanc nominà dal setur economich messarà la consulta dè jö arać sön programs y propostes metüdes a jì dala Zentrala di Consumadus. Inplü messarà la consulta inće dè jö arać sön dötes les interogaziuns metüdes a jì dal Govern y dal Consëi provinzial.
Tratan la pröma sentada él inće gnü aprovè le program d´ativitè dla Zentrala di Consumadus por le 2014. Tra l´ater él preodü chëstes ativitês tratan l´ann: la publicaziun dl raport di consumadus, confrunć di prisc, stüdi dles modaziuns dla economia de marćé, dè inant informaziuns y ester d´aiüt ai consumadus, sciöche inće l´elaboraziun de standards de cualité por sorvisc publics locai. La Provinzia finanziëia les ativitês dla Zentrala di Consumadus cun 380.000 euro.
Tla sentada él inće gnü tratè l´iubileum di 20 agn dla Zentrala di Consumadus ai 21 de novëmber dl 2014, olache al é preodü n incuntada al'Eurac a Balsan. Le tema dl'incuntada sarà l´importanza dla sconanza di consumadus y dles consumadësses sön döt le raiun europeich.
Inultima él inće gnü tut la dezijiun de arjingé ca na tuta de posiziun por ći che reverda l´acordanza comerziala "transatlantica" inater l´Europa y i Stać Unis d'America (che prevëiga inće mudamënć dla sconanza di consumadus) , na tuta de posiziun che sarà metüda adöm dala consulta nöia y che sarà spo portada dant da Arno Kompatscher al Consëi provinzial y ales istituziuns competëntes dla Uniun Europeica (EU).
rc
