Atualità
„Euregio Sport Camp“: L´incuntada por apascionà dl sport dai 15 ai 17 agn
Fà sport y incuntè jogn y jones dles trëi provinzies de Balsan, Trënt y dl Tirol: chësc pîta l´Euregio Sport Camp dai 13 ai 20 de messè a Baselga di Pinè tl Trentin. Tratan l'incuntada él sön le program en gröm de ativitês sportives sciöche arpizé, jadiné, nordic walking, dragon boat, trà cun l'ergo, cun laprò ćiamò escursciuns y workshops interatifs. La partezipaziun al camp costa 120 euro, le prisc cür le cost por le mangé y le dormì y assistënza. Les iscriziuns é davertes da śëgn inant.
L´incuntada Euregio - Sport Camp dai 13 ai 20 de messè é l´ocajiun ideala por düć i mituns y dötes les mitans che à interès da pratiché sport y da incuntè le cost por le mangé y le dormì y jogn y jones de dl Südtirol, Trentin y Tirol . Insciö ne ti vëgnel nia ma dè la poscibilitè da fà sport,mo inće da fà amizizies nöies y da aprofondì les conoscënzes dl todësch y dl talian.
Les ativitês sportives pitades é danter l´ater: arpizé, jadiné, nordic walking, dragon boat, trà cun l´ergo y jì a ćiaval. Implü gnaràl organizè deboriada escursciuns y workshops interatifs, olache al gnarà tratè tematiches sciöche l'alimentaziun sana, la preveziun dl doping y eserzizi por se regenerè dal sforz fisich.
I mituns y les mitans starà tl Hotel Scoiattolo, che pîta chisc sorvisc: nodadoia, azès internet, wellness y ćiamenes cun de plü leć. Por le mangé y le dormì y l´assistënza él da paiè indöt 120 euro por porsona.
Al po tó pert alplü dui mituns/döes mitans dai 15 ai 17 agn por vigni uniun dl sport. Por partezipé al Euregio sport camp ôl ester na conoscënza de basa por ći che reverda eserzizi sportifs y de bunes conescënzes dl todësch y dl talian.
Por les iscriziuns y informaziuns implü él da contatè l´Ofize provinzial por le sport, Tanja Radaj, plaza Silvius-Magnago 1, Balsan (telefon: 0471 412681; email: sport@provinz.bz.it).
rc
