Atualità
Dè Internazional di Museums en domënia ai 18 de mà
USP - En domënia, ai 18 de mà vëgnel festejé le „Dé Internazional di Museums“. 41 museums de döt Südtirol tol pert ala scomenciadia cun n program de na gran varieté por pići y gragn y cun l`entrada debann prësc indlunch.
41 istituziuns museales tol pert en domënia, ai 18 de mà, al "Dé internazional di museums" cun en program dër ampl y interessant elaborè fora ma por chësc dè. L´assessur por i museums Florian Mussner se conforta a chësta domënia y recorda inće la gran colaboraziun tra i museums che à fat meso da mëte a jì chësta scomenciadia: "An pò se fà n idea dla buna colaboraziun di museums sce an ćiara al program dër ampl y interessant che vëgn pité por chësc dè por pici y gragn".
Les iniziatives por le 18 de mà
Te prësc düć i 41 museums che tol pert ala scomenciadia é l´entrada debann. Al vëgn pité vijites cun acompagandus, workshops, referać, relaziuns, escursciuns, spazirades, discursciuns cun artisć, musiga, rapresentaziuns teatrales y tröp deplü. I mituns y les mitans pò se confortè a jüć y iniziatives speziales inće por ti fà capì damì les tematiches che vëgn mostrades ti museums plü desvalis.
Aladô dl moto internazional „Cöie adöm coliëia" él da odëi da en domënia inant te museums desvalis tl Südtirol inće le proiet „Cöie adöm coiëia. Le Museion fej vijita ai museums", olache l´ert contemporanea röia en contat cun formes tradizionales. Le proiet é organizé dala repartiziun provinziala di museums adöm ala fondaziun "Museion", le museum por ert contemporanea y moderna da Balsan. Indöt 12 operes de indöt 4.000 operes dla coleziun dl Museion gnarà metüdes en mostra te 12 museums te döta la provinzia. Chësta scomenciadia oress stabilì en coliamënt danter les coleziuns desvalies di museums y portè insciö i vijitadus y les vijitadësses a odëi i museums sciöche posć de coliamënt tra la storia, l´ert, la sciënza y l´archirida. Les operes vëgn imprestades fora ćina la fin de otober y é da odëi danter ater inće tla "Hofburg" de Porsenù, tl Museum Gherdëina y tl Museum Ladin Ćiastel de Tor.
Le program por le „Dè Internazional di Museums" pon ćiafè chilò: http://www.museen-suedtirol.it/
Informaziuns y material por la stampa pon indere ćiafè chilò: http://1drv.ms/1hNz63m
La lista de düć i museums che tol pert y le program dla scomenciadia é injuntà.
rc
Galaria dales fotografies
