Atualità
Mussner: „Mobilité tematica zentrala tl Südtirol"
USP - Aladô dla relaziun „Mobilität und Verkehr 2012“ („Mobilité y trafich 2012), publicada incö dal’Istitut provinzial por les statistiches ASTAT, él gnü registrè tl Südtirol tratan döt le 2012 indöt 24 miliuns de timbradöres sön i mesi dl trasport publich.
Tl stüde él scrit che „la maiù pert, 77,7 porcënt é gnü registré sön le trafich publich tles citês y tles fraziuns dlunja les citês". Le numer complessif de passajiers n'é nia complet, deache tratan le 2012 ne messâ i passajiers cun n abonamënt por studënć y por porsones sura i 65 agn nia timbré le iade. Aladô dl'esperiënza é le numer di passajiers dopelt tan gran, chël oress dì che tl 2012 él stè zirca 50 miliuns de timbradöres sön i mesi dl trasport publich. Por ejëmpl en confrunt al 2013, olache te Südtirol an registrè indöt 49.213.468 timbradöres sön i mesi dl trasport publich. „ Chël ô dì, che al é en valur mesan de 135.000 timbradöres al dè sön les ferates o les corieres te döt Südtirol, tratan i dis de laûr söporjö 160.000. Sce an compëda ćiamò laprò le trafich local tles gran citês, sciöche por ejëmpl tles vijinanzes de Balsan él gnü compedè danter 26.000 ćina 36.000 passaji de auti al dè, o por ejëmpl tles vijinanzes de Bornech cun 15.000 compedades de auti, dailò vëigun ći gran importanza y valüta che la chestiun dla mobilité à te döt Südtirol", dij l'assessur por la mobilité Florian Mussner.
Le maiù trafich de auti y dl trasport publich é gnü registré sciöche bele da tröć agn tles citês de Balsan y Maran y tles vijinanzes de chëstes döes citês. Un di punć plü critics é te chësc vers la localitè de Frangart, olache al é gnü mosorè la plü alta presënza de trafich. N punt important por l`assessur Mussner é insciö da surantò la ligna dla ferata Balsan - Mals y Balsan - Maran y inće l'eletrificaziun dla ferata che porta tl Vinschgau. Le start dles corieres nöies plü lungies dl Metrobus tla trata Balsan - Kaltern é dër positiv, inće por ći che reverda les prömes respostes y esperiënzes, insciö Mussner, che sotlignëia che le proscimo vare é la realisaziun dles infrastrotöres por le Metrobus. "Por diminuì i tëmps di iadi cun les corieres gnaral analisé inće la poscibilitè de n colegamënt non stop da Eppan a Balsan o da Kaltern a Balsan", dij Mussner.
Aladô dla relaziun dl'ASTAT él inće aumentè en relaziun al'ann 2012 le numer de inzidënć sön strada y de ferîs por gauja de inzidënć stradai. L' assessur Mussner fej n apel insciö a dötes les porsones da tignì ite y respetè le codesc dla strada: "Bel anfat sce an anüza le trasport publich, sce an é a pé, sön la roda o cun l'auto: le respet dl codesc dla strada, prudënza y respet por i atri é les premisses por avëi plü segurëza sön les strades". Te chësc vers él inće preodü ti proscimi mëisc na seria de iniziatives colegades al'aziun "No Credit" por sensibilisé i motoziclistsć por rovënn cun prudënza y segurëza sön les strades.
Informaziuns sön le stüde ASTAT "Mobilität und Verkehr 2012" pon ćiafè chilò.
rc
