Atualità
L’assessur Schuler presentëia ai 5 de jügn le raport nü sön l’agricoltöra y l’economia forestala
USP – I mesi por la sconanza dles plantes, l’economia agrara biologica, les vacanzes sön le lüch da paur y la pëscia: chëstes é les tematiches prinzipales dl raport nü sön l’agricoltöra y l’economia forestala dl 2013, che l’assessur por l’agricoltöra Arnold Schuler presentarà en jöbia, ai 5 de jügn dl 2014 a Welschnofen.
"Un di obietifs primars dl'agricoltöra é la sconanza dla contrada y porchël porvunse da adorè le plü che ara va mesi che scona les plantes. Impò él les conseguënzes visibles di mesi adorà che preocupëia la popolaziun, particolarmënter les porsones che n'é nia dl setur", spliga l'assessur Schuler. Chëstes preocupaziuns é da tó en conscidraziun y al é da porvè da ciafè respostes adeguades, insciö Schuler. Les conseguënzes di mesi por la sconanza dles plantes é ma öna dles tematiches tratades dal raport nü, danter l'ater él inće gnü tratè i cosć de produziun dl lat y la persistënza dl'economia forestala.
Tl raport nü sön l'agricoltöra y l'economia forestala dl 2013 vëgnel presentè danter l'ater i numeri sön le zidlamënt di tiers, la viticoltöra, l'alpicoltöra, l'agricoltöra y l'economia forestala. Le raport gnarà presentè dal assessur Arnold Schuler y dai direturs de departimënt Martin Parzeller y Paul Profanter tratan na conferënza stampa en
jöbia ai 5 de jügn
dales 10
tla scora forestala dl Latemar.
Implü gnaràl tignì le medemo dé tla scora forestala n curs de formaziun suplementara por colaboradus di parcs naturai y dles staziuns forestales. La scora forestala dl Latemar, le Zënter de formaziun por i bosć, la ćiacia y l'ambiënt, à süa sënta a Welschnofen, numer de telefonn 0471 612444, Fax 0471 618769, E-Mail forstschule.latemar@provinz.bz.it.
rc
