Atualità
L’assessuria Deeg se pronunziëia por plü sostëgn ales families adotives
USP – Mituns adotifs, mitans adotives y les families interessades à debojëgn de n aiüt permanënt y sistematich. Por podëi respogne damì ales nezescitês di mituns, dles mitans y inće di geniturs vëgnel atualmënter laurè fora n conzet de prevenziun da pert di ofizi de competënza dla Provinzia.
Les nezescitês y les dificoltês di geniturs adotifs y n valgügn provedimënć poscibli por aumentè le sostëgn y l'acompagnamënt dles families é stà les chestiuns zentrales tratan n'incuntada danter l'assessuria por la familia Waltraud Deeg y na rapresentanza de geniturs adotifs südtirolesc formada da Hugo-Daniel Stoffella y Sabrina Sborghi.
"Por ći che reverda les competënzes provinziales fej l'adoziun pert dl Departimënt por la familia y les politiches soziales; important de chësc vers él che le sostëgn sides garantì tan bëgn ai mituns y ales mitans co ai geniturs", spliga l'assessuria Deeg.
I rapresentanć di geniturs adotifs, Stoffella y Sborghi, à sotligné la nezescité de n intervënt partì sö te döes perts: da öna na pert messéssel gnì aumentè les poscibilitês da s'informè por i geniturs che oress adotè, dal'atra pert fóssel inće debojëgn da acompagné les families cun n aiüt psicologich tratan la puberté di mituns y dles mitans, olache al po saurì nasce incomprenjiuns y dificoltês te familia.
L'assessuria Deeg à impormetü da "orëi intensifiché le laûr de sostëgn ales families y da laurè fora n conzet de prevenziun plü ampl cun na revalutaziun dles mosöres de promoziun."
rc
