Atualità
Stocker: “Aumentè les cutes sön le tabach por smendrì le consum”
USP - Ai 31 de mà él le “Dé mondial cuntra le fomé” y l’assessuria por la sanité Martha Stocker anüza l’ocajiun por sotligné che la cutaziun sön le tabach é öna dles mosöres plü efetives por diminuì le consum de tabach. En chësc cunt él inće da recordè la proibiziun da fomé ti locai publics tla Talia; na mosöra che aumentëia inće la cualité dla vita.
Le cutaziun sön le tabach röia tla Talia a na prozentuala de 76,5 porcënt y ti Paîsc Todësc de 73 porcënt sön le prisc. "Fà paié les cutes sön le tabach é d'ütl por arbassè le consum y la proibiziun da fomé te posć publics aumentëia la cualité dla vita", sotlignëia Martha Stocker.
En general diminuësc tresfora le consum de tabach, inće por merit de n mudamënt de comportamënt dles porsones ti confrunć dla sanité: "Porchël él impò important da anuzé ocajiuns sciöche le Dé mondial cuntra le fomé por recordè che la venüda de produć da tabach é alta y che le fomé tabach é la pröma gauja de mort al monn da chëra che an po se stravardè", insciö Stocker.
rc
