Atualità
L’assessur Mussner incunta Ingrid Felipe por na politica dl trafich unitara
USP - Por coordiné damì la politica dl trafich tl raiun dles Alpes s’à incuntè incö, ai 4 de jügn, l’assessur por la mobilité Florian Mussner cun Ingrid Felipe, assessuria por la mobilité dl Tirol. Tematica dla incuntada é inće stada la edema dl trafich dal 23 al 27 de jügn a Desproch.
Les Provinzies dl Tirol y dl Südtirol ô aumentè tl dagnì la colaboraziun, inće por podëi insciö laurè adöm ala diminuziun dl trafich pesoch tl raiun dl Prener y por aumentè le trafich de marćianza sön les scines. Ai 24 de jügn gnaràl organisé tla cornisc dl proiet „iMONITRAF!"- na incuntada dles istituziuns politiches dles provinzies y regiuns tl raiun dles Alpes, cun la fin de porté inant la chestiun de na coordinaziun suraregionala dl trafich pesoch tles Alpes.
Al fej pert dl proiet "iMONITRAF!" les Provinzies de Tirol, Südtirol, Trënt, la Regiun dla Valle d'Aosta, la Svizera zentrala, le Ćiantun dl Tessin, la Regiun Rhône-Alpes, l'Academia Europeica (EURAC) y les agenzies por l'ambiënt dl Friul y dl Piemont. Implü gnaràl inće laprò tratan la incuntada a Desproch de plü rapresentaziuns internazionales y al gnarà organisé manifestaziuns y incuntades publiches.
"Le obietif é la costruziun de na regolamentaziun internazionala por spostè le trafich de marćianza dales strades sön les scines, dandaldöt por ći che reverda le trafich pesoch tl raiun dl Prener", spliga l'assessur Mussner tratan la incuntada. L'assessuria Ingrid Felipe sotlignëia che: "Le Provinzia de Tirol y la Provinzia de Balsan é a öna che les conoscënzes strategiches por la regolamentaziun dl trafich mëss gnì unificades te döt le raiun dles Alpes y insciö porvunse da laurè fora tratan la incuntada a Desproch n signal tlër de colaboraziun a livel sura-regional"
rc
