Atualità
Concurs suraregional„Le turism incunta l’agricoltöra“: Al vëgn chirì proieć
USP – Por le concurs dal titul “Le turism incunta l’agricoltöra” vëgnel chirì proieć de colaboraziun interessanć che reverda i seturs dl turism y dl’agricoltöra. Le concurs é rové ala cuarta ediziun y vëgn organisé por le terzo iade te döt le raiun dla Euregio.
„Le fin de chësta scomenciadia é chël da mostrè les particolaritês de nostes teres, spezialmënter te n monn tres plü globalisé", insciö scrî le presidënt dla junta Arno Kompatscher y l'assessur por l'agricoltöra Arnold Schuler tla introduziun al concurs.
Canche i seturs dl turism y dl'agricoltöra s'incunta y laôra adöm pol nasce proieć interessanć che po gnì anuzà da entrambes les perts. Insciö ti à por ejëmpl le proiet che é rové al pröm post l'ann passè mostrè sides ala popolaziun locala che inće ai sciori la vita da vigni dé sön les munts. La cooperaziun dla scora por l'agricoltöra da Dietenheim y dla scora alberghiera da Bornech, che à inće davagné tl 2013, à portè dant ai scolars les particolaritês de tramidui i seturs. Le terzo proiet che é gnü premié l'ann passè à porvè da motivé i eserzizi publics da adorè deplü i produć dl post.
Insciö vëgnel chirì inće por chësc ann " manifestaziuns, proieć, produć, sorvisc, mosöres o scomenciadies (che é bele gnüdes realisades, che é tl mëteman o che vëgn ćiamò planificà), mo inće idees y propostes realistiches o poscibles da realisé, che contribuësc ala promoziun dla cooperaziun dl turism y dl'agricoltöra".
Fà para ne po nia ma assoziaziuns privates, mo inće dites, comuns, uniuns, istituziuns o scores de döt le raiun dla Euregio: dla provinzia de Balsan, dl Tirol y dl Trentin. Les iscriziuns vëgn azetades ćina en vëndres, ai 5 de setëmber dl 2014.
De plü informaziuns sön le concurs „Le turism incunta l'agricoltöra" pon ciafè al numer de telefonn 0471 289087, tres la misciun email info@transkom.it o sön la plata internet
http://www.tla-euregio.info/, olache an po inće dè na odlada ai proieć di agn passa. Che che davagna le concurs gnarà chirì fora da na iuria. I pesć che gnarà partis fora à n valur complessif de 6000 euro.
rc
