Atualità
I prighi dla natöra: La Repartiziun Costruziuns idrauliches tles scores
N travert dla Repartiziun provinziala Costruziuns idrauliches é portè pro ala cosciënza dla popolaziun dla vita cun prighi tla natöra. Les cuartes y cuintes tlasses dla scora elementara Montessori da Porsenù à laurè sö sot forma de jüch le tema plan di raiuns tl prigo.
Les scolares y i scolars à naôta baié te tlassa cun esperć dla Repartiziun provinziala Costruziuns idrauliches porsura articui de folieć sön evënć dla natöra y ilustré le tema prighi dla natöra tres fotografies y films. Daldô à Philipp Walder dl Ofize provinzial Sistemaziun di rüs da munt y paralovines nord splighé i conzeć de sconanza desvalis, y plü avisa, la sconanza tres costruziuns de sconanza tecnics y chi tres la planificaziun di raiuns tl prigo.
Spo él gnü trasformè la teoria tla pratica: cun l'architëta dla contrada Marion Aschbacher y le geologh dles eghes Peter Hecher dla Repartiziun provinziala Costruziuns idrauliches él gnü porvè fora pro n pice rivarel dlungia le rü d'Eores tl resservar sura Albeins le plan dl raiun tl prigo. Les scolares y i scolars à metü sö n pice insediamënt de ćiases fates instësc dlungia rü y à fat a na moda che al gniss l'ega alta. Ai à realisé n plan de raiun tl prigo y à sciazè le prigo, segnan raiuns cöci, bröms y ghei. Le travert dl proiet de scora, spliga l'architëta dla contrada Aschbacher, ê da ti fà conësce ales scolares y ai scolars le tema prighi dla natöra y mostrè sö tres le jüch le plan de raiun tl prigo. L'esperta sotrissëia che al é important da ne rapresentè nia le rü sciöche val de prigorus, mo da dè inant la ligrëza da fà la blëita y costruì dlungia rü. Tla natöra é le respet important, se comportè sciöche al alda cun i prighi dla natöra é la basa, por podëi vire en armonia cun la natöra.
USP
