Atualità
Plü sostëgn por les porsones cun la ponsiun minima
USP – La Junta provinziala à aprovè incö tratan süa sentada n aumënt dl sostëgn finanziar por les porsones cun na ponsiun minima y che prevëiga n aiüt finanziar sön les spëises sön l’abitaziun de n valûr ćina indöt 170 euro. Implü à la Junta provinziala stabilì incö da paié fora n imprëst por le ressanamënt dles prömes ćiases y la rediscusciun di contrać de afit por de plü sëntes provinziales.
Öna dles dezijiuns plü importantes tutes incö dala Junta provinziala tratan süa sentada é stada l'aumënt dl sostëgn por les porsones cun na ponsiun minima. Les modalitês dla mudaziun é gnüdes presentades incö dal'assessuria Martha Stocker tratan la conferënza stampa do la sentada: "Insciö vëgnel aumentè y slarié fora l'integraziun ala jënt en ponsiun por les spëises sön l' abitaziun da atualmënter 70 euro a indöt 170 euro. Cun chësta mudaziun él stè poscibl da aumentè les ponsiuns zënza che les istituziuns statales podess diminuì so contribut sön la ponsiun o damanè zoruch na pert dla ponsiun" spliga Martha Stocker.
Deache n aumënt diret dles ponsiuns ess podü avëi sciöche conseguënza n smendrimënt dl import paié fora dal Stat, à la Provinzia porvè da ciafè na variaziun che porta a n sostëgn finanziar efetif por les porsones cun la ponsiun minima. „Insciö unse aumentè ćina 170 euro le contribut por les spëises sön l'abitaziun y che n'é nia sotmetü a cuta. Dërt a n'aumënt indiret dla ponsiun à düć i ponsionà sura i 70 agn, che vir susc, che à n davagn anual che ne röia nia sura i 7800 euro y che po damanè do n contribut por les spëises sön l'abitaziun", spliga Stocker. Plü o manco 4.000 porsones à le dërt da fà domanda y la spëisa por la provinzia sarà de zirca 6 miliuns de euro. L'aumënt gnarà efetif dal pröm de messè y por stlarì i vari por podëi fà les domandes por l'aumënt gnaràl organisé n dé dla porta daverta por jënt atempada da d'altonn. "Les domandes por l'aumënt po gnì fates dailò y arà na valënza retroativa ćina al pröm de messè", insciö Stocker. Implü à la Junta inće aprovè n aumënt dl sostëgn por l'afit dai 75 ćina ai 85 euro por porsones che tira sö i mituns da susc.
N'atra dezijiun importanta tuta dala junta incö é la rediscusciun di contrać d'afit danter la provinzia y i proprietars di frabicać y che podess portè a na reduziun dles spëises publiches. Insciö vëgnel paié do n stüde fat dal Ofize sciazada atualmënter afić che é dal 10 al 15 porcënt plü alć en confrunt dl prisc söl marćé. "L'assessur por le patrimone Florian Mussner s'à informè incö che al é insciö preodü na rediscusciun di contrać por l'anuzamënt de desvalis frabicać, sciöche por ejëmpl por la sënta zentrala dl'aministraziun publica, la sënta dla Südtirol Marketing Gesellschaft (SMG) a Balsan, la sënta dl museum archeologich y la sënta dla Curt di cunć", dij Christian Tommasini incö tratan la conferënza stampa.
Por podëi sostignì le setur de costruziun mo inće le zitadin che à debojëgn da renovè süa abitaziun, él inće gnü aprovè incö i criters por le sostëgn finanziar por le ressanamënt de prömes ćiases. Sciöche preodü da na lege statala pol gnì detrat dales cutes le 50 porcënt di cosć por n import che ne superëia nia i 96.000 euro por ći che reverda le ressanamënt de prömes ćiases. Chësc import mëss gnì naôta paié damperfora dal zitadin por gnì spo detrat dales cutes. "Deache n gröm de porsones n'à nia a desposiziun na soma tan alta por podëi finanzié i laûrs de ressanamënt él la provinzia che mët a desposiziun n imprëst zënza degönes tasses y che é da paié zoruch te n paiamënt de 10 rates partì sö te 10 agn", dij l'assessur Christian Tommasini. Por podëi fà domanda por n imprest val debojëgn de na detlaraziun dl diretur de costruziun sön i laûrs fać o preodüs por le 2014 y 2015 y di cosć de chisc laûrs. Sce i laûrs de ressanamënt é bele gnüs stlüć jö spo él le proprietar dl abitaziun che mëss dè jö la detlaraziun dles cutes, olache an po inće odëi l'import dles detraziuns fiscales. Le contrat che vëgn scrit fora danter le propietar dl'abitaziun y la provinzia stabilësc n imprest da paié zoruch te 10 agn. "Tres cun na detlaraziun dl diretur de costruziun pol inće gnì damanè do n imprest por laûrs che n'é nia ćiamò rovà. Döes é les condiziuns por l'imprest: al mëss se tratè dla pröma ćiasa y al n'é po nia se tratè de n ressanamënt energetich", stlüj jö Tommasini. Les domandes po gnì fates dal 1. de messè inant.
rc
