Atualità
La mudaziun di orars dl trasport publich porta para de plü novitês
Arbassè i cosć, aumentè l’efiziënza y la vijinanza ai zitadins: cun la presentaziun dla app nöia “Südtirol ToGo” y cun l’otimisaziun dla chirida online di orars dl trasport publich à l’Agenzia por la mobilité fat n vare important tla direziun dl trasferimënt di sorvisc publics sön formes digitales.
Sön chësta basa él gnü presentè incö i orars di mesi dl trasport publich por l'isté y l'invern dal assessur por la mobilité Florian Mussner adöm cun le diretur dla repartiziun Valentino Pagani y le diretur dl'Agenzia por la mobilité Roberto Rubbo tratan na conferënza stampa a Balsan.
Insciö n'él nia ma gnü mudé les definizius de n valgönes architades dles corieres, mo por miorè le sorvisc dla conoscënza y dl anuzamënt di orars di mesi dl trasport publich gnarà la chirida online otimisada y implü gnaràl inće metü a desposiziun na app nöia. "L'app nöia y la plata internet é por le momënt n'integraziun ai libri stampà di orars, che an po ciafè tres inant mo olache i ùn arbassè le numer dles ediziuns", spliga l'assessur Mussner. La chirida online y l'app porta insciö nia ma a n smendrimënt di cosć de stampa mo é inće n vare inant cuntra la presënza digitala dles informaziuns online che po gnì adorades prësc indlunch te na manira scëmpla cun le fonin y na conesciun internet, insciö Mussner. La chirida online pon inće fà por ladin tres la plata internet http://www.mobilitaaltoadige.info/lad, olache al vëgn dè dant avisa i orars di mesi publics te döt le Südtirol y eventualmënter inće i trus che an mëss fà a pé da na staziun o da n'architada al'atra. Implü podaràl gnì garantì n ajornamënt constant dla plata internet, che conzed insciö inće da inserì al momënt mudaziuns pro i orars.
Por ći che reverda l'app nöia, che an podarà tó jö da internet por dötes les verjiuns de smartphone (sides Android che inće IOS) dal 15 de jügn inant, saràl poscibl da inserì dui posć, un de partënza y n post final, por ciafè fora i coliamënć plü asvelć di mesi de trasport. Tla banca dać él gnü inserì düć i coliamënć cun la ferata y les corieres. Implü pon inće ciafè sön l'app informaziuns sön posć olache an po storje pro o trates che an mëss fà a pé por rové da na architada al'atra. Sciöche sotrissé da Roberto Rubbo, diretur dl'Agenzia por la mobilité é le proiet dla app tl mëteman y gnarà otimisé tres les segnalaziuns dles porsones che anüza le sorvisc.
Tratan la conferënza stampa él inće gnü splighé les modaziuns ai inoms dles architades, che é gnüdes efetuades en colaboraziun cun i comuns y che porta da sëgn inant n inom plü spezifich y insciö plü saurì da ciafè.
rc
Galaria dales fotografies
