Atualità
Ass.a Stocker sön le dé mondial cuntra la violënza sön la jënt atempada
Usp – En ocajiun dl Dé mondial cuntra la violënza sön les porsones atempades recorda l’assessuria Martha Stocker les scomenciadies locales dl proiet interregional “Violënza tla vedla eté” danter Südtirol y Tirol. Le fin dl proiet é la sensibilisaziun dla popolaziun. “Les vitimes y düć i testemoni de violënza sön jënt atempada dess segnalè vigni maltratamënt telefonan al numer vërt”, dij Stocker.
Öna dles mosöres che la provinzia à ativé por porvè da smendrì la violënza sön les porsones atempades é la sensibilisaziun dla popolaziun sön chësta situaziun. "Le proiet che i ùn organisé adöm cun le Tirol à propi sciöche fin la sensibilisaziun dla popolaziun, inće por podëi te n secundo momënt daidé spo te na manira concreta les vitimes", dij Stocker. Insciö él gnü partì fora placać y flyer por todësch, talian y ladin ti zëntri di raiuns soziai dles döes provinzies y tles architades dles corieres. Implü gnaràl mostrè tratan jügn y messè por cinch edemes alalungia n retlam tl Cineplexx de Balsan y tl Odeon Cinecenter de Bornech sön chësta tematica.
Da püch él inće atif le numer vërt 800 001 800 dl raiun sanitar de Balsan, olache la popolaziun de döt le Südtirol po telefonè. L'assessuria Martha Stocker prëia dötes les porsones interessades, vitimes mo inće testemoni de violënza, da cherdè sö por ativé insciö i aiüć che va debojëgn.
Tres tla cornisc dl proiet él gnü fat n stüde dal Istitut "Apollis" che à ćiafè fora, che la violënza sön porsones atempades é gonot inće portada dant sciöche agressivité verbala da pert dl personal de cura. Por podëi portè le personal de cura à mudé so comportamënt te caji de maltratamënt val debojëgn che le personal dübitëies de so comportamënt. Insciö él inće gnü elaborè n conzet de formaziun por le personal de cura ti raiuns dla sanité y dles politiches soziales, insciö Stocker.
Sön la plata internet dl proiet www.gewaltimalter.eu/ pon ćiafè inant informaziuns, articui, intervistes, videos sön la tematica dla violënza sön les porsones atempades. Implü vëgnel inće presentè le proiet "Violënza tla vedla eté" é gnü organisé tl Südtirol dal Ofize Jënt atempada adöm cun i raiuns soziai y cun l'Ofize Formaziun dl personal sanitar.rc
