Atualità
L' ass. Tommasini à presentè le program dles operes sön strada (23.06)
L’assessur por i laûrs publics Christian Tommasini à presentè incö tratan na conferënza stampa a Balsan le program dles operes sön strada che gnarà scrites fora ti proscimi trëi agn.
Da püch à la junta provinziala aprovè le program dles operes publiches sön strada ćina la fin dla legislatöra. Le program é gnü presentè incö dal assessur por i laûrs publics Christian Tommasini y dal diretur de repartiziun Gustav Mischì. Al é preodü na spëisa de indöt 92 miliuns por le 2014 y de 72 miliuns por vigni ann dal 2015 al 2018.
“Le program é gnü metü adöm sön la basa di mesi finanziars y dles prioritês stabilides dai tecnics, sciöche por ejëmpl la segurëza dles strades y le colegamënt cun l’autostrada dl Prenner ”, spliga Tommasini. L’assessur Tommasini recorda che la realisaziun dla zirconvalaziun de Balsan, che é partida sö te trëi loć, depënd dal concurs por la gestiun dl’autostrada dl Prenner ( le 50 porcënt di finanziamënć dess gnì curì dal concurs).
Por le 2014 él preodü na spëisa de 92 miliuns de euro: la gran pert, 74 miliuns, é gnüda liada al finanziamënt de 62 proieć (categoria A1) che é bele tla fasa de realisaziun. Tla categoria A2 él gnü inserì 17 operes sön la basa dles prioritês, sciöche por ejëmpl le prigo de peres sön strada, la segurëza stradala y la posiziun dla strada tres l’autostrada dl Prenner. Chëstes 17 operes gnarà scrites fora tl 2014 y sarà finanziades laprò cun i 18 miliuns che resta por le 2014.
N valgönes de chëstes 17 operes sön strades é: l’ampliamënt y le mioramënt dla strada de Algund dal chilometer 196,25 al cm 197,30 (995.000 euro), le ressanamënt dla strada Nals-Terlan y Eppan (784.00 euro); la realisaziun dl secundo lot dla strada sön le Ritten (12.362.000 euro), le ressanamënt dla strada danter Sëlva y Plan dal cm 22,730 al cm 24,630 (4.385.000 euro); le ressanamënt di mürs de proteziun sön la strada a Gossensaß (1.996.000 €), le punt a Franzensfeste al cm 488,630 (1.559.000 €), la demoliziun de n punt tl comun de Mareo (-) y la realisaziun de n transimënt zircolar a Kaltern danter la SP 14 y la SP 15 (471.000 €).
Les operes plü importantes che gnarà scrites fora tratan le 2015 é l’entrada dla strada tla Val Badia, la zirconvalaziun de Vahrn, l’azès asvelt al zënter de Porsenù, le ressanamënt dla strada che porta tl Val d'Ega y le ressanamënt dla strada sön la Mendola.
Por le 2016 él preodü da scrì fora la zirconvalaziun de Maran, la zirconvalaziun de Kastelbell, la zirconvalaziun de Kiens y chëra de Branzoll.
Tommasini à sotrissé che la provinzia à metü a desposiziun i mesi finanziars por curì les spëises y che insciö él stè poscibl da inserì tl program la gran pert les operes da realisé cun na certa prescia, sciöche inće le ressanamënt dles strades. Te d'atres provinzies él indere gnü straihé operes che gnô da püch ćiamò aratades de prescia, sciöche a Trënt, mo nia a Balsan, dij Tommasini.
rc
