Atualità
L’assessur Theiner va a ti ćiarè al parch natural Trëi pizes de Lorëi
„Nos düć messun renforzè deplü le lian danter la popolaziun locala y le patrimone mondial Unesco dles Dolomites”: chësc le messaje dl assessur Richard Theiner tratan süa vijita al parch natural dles “Trëi pizes de Lavaredo”. La daurida dla mostra sön chësta tematica é preodüda te cört tëmp.
La preparaziun por la mostra sön les Dolomites sciöche patrimone mondial dl Unesco messass gnì stlüta jö ćiamò tratan chësc isté. L’assessur por l’ambiënt Richard Theiner à insciö fat vijita da püch ala ćiasa dl parch natural Trëi pizes de Lorëi a Toblach. “De plü scomenciadies vëgn organisades por portè le patrimone dles Dolomites plü dlungia ala popolaziun locala”, à dit l’assessur Theiner tratan süa vijita. Tratan l’incuntada él inće gnü debatü adöm cun i rapresentanć dl comun de Sanćiana y dla ćiasa dl parch natural de Toblach sura de plü tematiches sciöche por ejëmpl la manutenziun y denominaziun dla rëi di trus tl parch natural, l’inauguraziun dla staziun dl parch natural tl 1999 y la realisaziun de n trasport publich por diminuì le trafich tl raiun dl Innerfeldtal.
Le parch natural Trëi pizes de Lorëi é gnü istituì tl 1981 sciöche sesto parch natural tl Südtirol. Le raiun d’espanjiun é de 11.635 hectars y é partì sö danter i comuns de Sanćiana, Toblach y Le Sest. Le numer de vijitadus é vigni ann de presciapüch 500.000, 450.000 d’isté.
rc
Galaria dales fotografies
