Atualità
Dala Junta: Museum Ćiastel Tirol, svilup rural 2014/2020, Euregio
Le museum storich – cultural de Ćiastel Tirol vëgn inserì tl’Aziënda museums provinziai: chësta dezijiun à la junta provinziala tut incö, mertesc ai 24 de jügn. Cun chësta mudaziun podaràl gnì scemplifiché tl dagnì les prozedöres aministratives y la gestiun unitara di museums provinziai. Implü él inće gnü aprovè le program por le svilup rural 2014/2020
Ćina sëgn gnô le museum storich – cultural de Ćiastel Tirol aministré separat da n consëi d’aministraziun aposta y la gestiun dl museum ê organisada tres n ënt autonom. Sciöche al é preodü tla convenziun dla coaliziun gnüda concordada tl mëteman dla legislatöra da scemplifiché les prozedöres aministratives à la junta provinziala tut incö la dezijiun da inserì le museum de Ćiastel Tirol tla lista dl’Aziënda museums provinziai, jon insciö tla direziun de na gestiun unitara de dötes les strotöres culturales dla provinzia. Le Presidënt dla Provinzia, Arno Kompatscher à splighé tratan la conferënza stampa do la sentada dla junta che la funziun de rapresentanza dl ćiastel gnarà mantignida: “Ćiastel Tirol é na richëza por la provinzia y de gran valûr storich-cultural, y insciö gnaràl dessigü tut ca tl dagnì por evënć, manifestaziuns y scomenciadies culturales.” L'Aziënda museums provinziai é n ënt provinzial che à en gestiun i ot museums dla provinzia: le Museum Natöra Südtirol, le Museum archeologich dl Südtirol, le Museum ladin Ćiastel de Tor, le Museum provinzial dles usanzes y dles tradiziuns, le Museum provinzial dla ćiacia y dla pëscia, le Museum provinzial dl vin, le Museum dles mineores y le Touriseum. L'Aziënda museums provinziai se crüzia dla coordinaziun, dl marketing, dla gestiun dl personal y dla contabilité de chisc museums.
Implü à la junta provinziala aprovè incö la proposta por le program por le svilup rural 2014/2020 y insciö inće la trasmisciun dles propostes ala Comisciun europeica por l’aprovaziun da pert dles istituziuns a livel europeich. Le program por le svilup rural é la fondamënta por la definiziun dles prioritês tl setur agrar y tl’economia forestala di proscimi agn.
Tl mëis de otober dl ann 2011 à la Comisciun europeica definì les propostes legislatives por ći che reverda i programs nüs por le svilup rural dal 2014 al 2020. Insciö à la Comisciun europeica stabilì che la programaziun por le svilup rural sarà basada sön la realisaziun di obietifs dla strategia de chersciüda Europa 2020 y che i criters sarà danter l’ater l’inovaziun, la competitivité y la sostenibilité. La junta provinziala à insciö autorisé incö la trasmisciun dla proposta por le svilup rural dla provinzia ćina le 2020 ala Comisciun europeica. Do che le program gnarà aprovè a livel europeich podarà la programaziun jì inant tres la realisaziun dl program da pert dles istituziuns locales.
Inultima à la junta provinziala stabilì incö che le pröm punt sön l’ordinn dl dé dles sentades edemales sarà da śëgn inant dediché al raiun dl’Euregio (Südtirol – Tirol – Trentin), inće por avëi insciö vigni edema n ajornamënt sön les scomenciadies y sön i proieć a livel suraregional. Insciö él inće preodü l’ativaziun de n news-ticker sön internet y tres n'app por informè dé por dé i zitadins dles trëi provinzies sön les novitês y sön i resultać dla cooperaziun suraregionala.
rc
