Atualità
Agenzia dles Entrades: Concurs por 30 posć
Dal 2011 inant à l’Agenzia dles entrades scrit fora de plü concursc por l’assunziun de personal, zënza avëi mai preodü l’aumënt de posć te Südtirol. Śëgn gnaràl inće scrit fora 30 posć tl Südtirol. Chësc é gnü anunzié dan da püch dala secreteria provinziala dla SGBCisl Agnes Haller y dal’assessuria por le laûr Marth Stocker. “Finalmënter à les bries de agn alalungia portè sü früć”, dij Stocker.
Te de plü sentades y incuntades â ti ultimi agn n comitê y le sindacat “SGBCisl sorvisc publich” damanè do n concurs por l’aumënt de posć de laûr pro l’Agenzia dles entrades. Do les prozedöres nezesciares pro i ministers interessà y n gran laûr de traduziuns po śëgn le concurs gnì scrit fora. En döt gnaràl scrit fora 30 posć pro l’Agenzia dles entrades. “Na mosöra nezesciara, deach tl’Agenzia él atualmënter na manćianza de posć”, spliga l’assessuria Stocker.
„Les bandides dl concurs gnarà fates sön le trù telematich“, dij Agnes Haller. 18 posć gnarà scrić fora por assistënć tl setur dl’aministraziun y dles cutes: 12 posć por le grup linguistich todësch, 5 por le talian y 1 por le ladin. I atri 12 posć é preodüs por impiegać dl sorvisc alt tl setur dl’aministraziun y dles cutes: 8 por le grup linguistich todësch, 3 por chël talian y 1 por le ladin.
Le domandes por la partezipaziun al concurs mëss gnì dades jö alplü tert ai 23 de messé 2014 dales 23:59 sön via telematica tres la plata internet http://www.12tribbz.it/. De plü informaziuns sön le concurs pon ciafè sön la plata internet: http://altoadige.agenziaentrate.it/.
rc
