Atualità
Iagri de livel alt – L'assessur Schuler partësc fora i diploms
“La ćiacia alda pro la cultura de nosta tera y mëss gnì praticada cun cosciënza”: chësc à dit l’assessur por l’agricoltöra Arnold Schuler tratan la surandada di diploms a indöt 102 iagri nüs ai 27 de jügn a Balsan. Indöt à porvè da fà l’ejam 285 candidać.
„Les ghiranzes dl ejam é altes, chësc inće por mantignì n valur alt dla ćiacia tl Südtirol”, à sotrissé l’assessur Schuler tratan la surandada. Insciö alda por l’arat positif dl ejam da iagher laprò inće l’adempimënt de de plü dovëis y oblianzes, che é gnüdes portades dant tratan la premiaziun. La ćiacia é danter l’ater de gran valüta por l’ecuiliber y la persistënza di bosć y dl’agricoltöra, inće deache ara dëida stravardè da maraties, insciö Schuler.
Adöm cun le diretur dl Departimënt por l’agricoltöra y i bosć Paul Profanter, cun le diretur dl Ofize ćiacia y pëscia Andreas Agreiter y cun la comisciun dl ejam à l’assessur Schuler surandè a indöt 102 candidać i zertificać de iagher adöm cun na picia aodla dal pom.
Le numer di iagri tl Südtirol é insciö atualmënter de zirca 6.000, cun n aumënt consistënt ti ultimi agn dla presënza de ëres amesa i iagri, por le momënt sura 300.
Inultima à le diretur Agreiter recordè che tl dagnì saràl preodü de plü mudaziuns tres por miorè l’educaziun y les competënzes di iagri.
rc
