Atualità
Le proiet sura-reg. “Violënza tla vedla eté” é gnü stlüt jö cun n convëgn
Cun n convëgn final él gnü stlüt jö inier, mertesc al 1. de messè le proiet sura-regional “violënza tla vedla eté“ danter i Länder de Südtirol y Tirol. “La violënza sön jënt atempada ne po nia ester n tabu; cun chësc proiet orunse nos mostrè sö al personal de cura strategies sön co afrontè la tematica”, chësc à dit inier Martha Stocker.
„Sciöche canche le arbiter sciüra canche al vëiga n fal, insciö messunse inće nos segnalè avenimënć y espresciuns de violënza por podëi fà valch decuntra”, cun chëstes parores à metü man inier, al 1. de messè, la direturia dl Ofize jënt atempada Brigitte Waldner süa relaziun.
„Por gaujia dl laûr de sensibilisaziun cun placać, le numer vërt y d‘atres scomenciadies ne é la tematica dla violënza tla vedla eté nia plü n tabu, mo ara é na tematica che vëgn portada dant”, à splighé l’assessuria por la sanité Martha Stocker tratan le convëgn. Döes espresciuns de violënza é stades al zënter dla discusciun, da öna na pert la violënza sön la jënt atempada, dal’atra pert inće la violënza da pert dla jënt vedla che datrai va cuntra le personal de cura, insciö Stocker che à sotrissé, che al é dandaldöt le personal de cura y les persones che laôra vignì dé tles ćiases de palsa o a ćiasa che sa tan tröpa forza, paziënza y buna orentè che al va debojëgn pro la cura dles persones atempades. Le proiet à l’obietif da daidé les persones che se crüzia dla jënt atempada pro la preparaziun al laûr y ala cura.
La coordinadëssa dl proiet, Esther Jennings, à dit che al à fat para al proiet indöt 45 porsones te de plü grups de laûr. “Tratan le proiet él gnü fat inrescides sön ći che va debojëgn tratan la cura a ćiasa sciöche inće tles ćiases de palsa, daldô él gnü cherié n conzet de formaziun y na campagna de sensibilisaziun cun de plü aziuns”, à splighe Jennings. Les porsones che an à orü arjunje cun chësc proiet é stades le personal de cura tles ćiases de palsa, te ćiases privates, sciöche inće ti raiuns dla sanité, studënć y colaboradus tl setur sozial, doturs y familiars.
“Nosc stüde dij che le 20 porcënt dles porsones intervistades ti raiuns sanitars y de cura mostra sëgns de n pëis sterch”, à dit Jennings. Faturs de risch, che aumënta la propabilité de violënza sön la jënt atempada, dess ester por ejëmpl manćianza de tëmp, stress o la dezijiun falada dla profesciun, aladô de Jennings che à dit inant, che n gröm de porsones che à en cura jënt atempada ne conësc nia deplëgn i aiüć che ai po ciafè. La maiù pert dles espresciuns de violënza ne é nia fisics, mo psichics, à dit öna dles coordinadësses dl proiet, Pirrone.
Le conzet de formaziun che é gnü elaborè tratan le proiet, che contëgn inće n program de e-learning tres l’internet, gnarà metü a desposiziun debann por le personal de cura da d’altonn inant. Implü gnaràl inće dè fora na racoiüda de prozedimënć y metodes por studënć.
Tratan le proiet él gnü partì fora placać y flyers por todësch, talian y ladin ti zëntri di raiuns soziai dles döes provinzies y pro les architades dles corieres. „Implü él gnü mostrè n retlam tl Cineplex de Balsan y tl Odeon Cinecenter de Bornech sön chësta tematica“, à dit Perrone. Da püch él inće atif le numer vërt 800 001 800 dl raiun sanitar de Balsan, olache la popolaziun de döt le Südtirol po telefonè sciöche inće la plata internet www.gewaltimalter.eu/, olache an po ciafè informaziuns, articui, intervistes y videos sön la tematica.
rc
