Atualità
Mesi por la sconanza dles plantes: la Junta stabilësc les diretives
Stlarì, informè y se dè jö cun la discusciun: la Junta provinziala dl Südtirol ne ô nia ma atuè i regolamënć por ći che reverda l’adoranza di mesi por la sconanza dles plantes, mo ara ô inće ester un di raiuns plü inovatifs. Inier, mertesc al 1. de messè à la Junta provinziala aprovè la proposta dl assessur Schuler che prevëiga mosöres desvalies.
Cun les diretives, che la Junta à aprovè inier (01.07), oress la Junta provinziala sconè la sanité di zitadins cuntra l’adoranza de mesi por la sconanza dles plantes: “Indlunch olache la popolaziun röia en contat cun mesi adorà por sconè les plantes”, sotrissëia l’assessur Schuler, “mëssel gnì adorè le plü che ara va les tecniches plü modernes por ćiarè da sconè le plü poscibl le zitadin.” Le Presidënt dla Junta, Arno Kompatscher, à dit do la sentada dla Junta che “la tematica é dër complicada. Porchël él gnü arjigné ca diretives nöies, do n’ejaminaziun lungia dla tematica, sön les mosöres nezesciaries por le dagnì.” Nia ma la situaziun tl Südtirol é gnüda studiada plü avisa mo inće prozedimënć inovatifs por podëi rové pro les prömes regiuns tla Talia por ći che reverda l’adoranza dles mosöres de proteziun plü modernes, insciö Kompatscher.
Le plann d’aziun nazional dla Talia por n’adoranza sostenibla di mesi por la sconanza dles plantes é jü en forza chësc ann. Inće tl Südtirol é la cosciënza di zitadins sön l’adoranza di mesi por la sconanza dles plantes chersciüda cun le tëmp. Stlarì, informè y se dè jö cun la discusciun: Chëstes les prioritês dl assessur Schuler por ći che reverda chësta tematica. Insciö oress Schuler nia ma tignì ite les regoles scrites dant dal plann d’aziun nazional mo mëte adöm na seria de standarg ćiamò plü alć co chi dà dant.
“Insciö él gnü aprovè na lista cun diretives y mosöres por porvè da laurè sö te de plü ćiamps la tematica dl’adoranza di mesi por la sconanza dles plantes”, à splighé Schuler. “Cun stüdi, inrescides, esperimënć y tesć scientifics orunse ciafè fora deplü sön chësta tematica y sön sües conseguënzes”, insciö l’assessur por l’agricoltöra.
rc
