Atualità
Mürs de proteziun cuntra l'ega alta dl rü d’Al Plan
Indöt investësc la Repartiziun Costruziuns idrauliches 390.000 euro por la costruziun de proteziuns cuntra l'ega alta dl rü d’Al Plan tla zona artejanala “Möbel Mareo” tl Comun de Mareo. Inier, lönesc ai 14 de messè, à l’Ofize sistemaziun de rüs de munt y paralovines ost dla Repartiziun Costruziuns idrauliches metü man cun i laûrs de costruziun de mürs de proteziun.
I laûrs de costruziun prevëiga n stabilimënt nü y plü sigü dl rü cun mürs de proteziun cun petun d’acià dlungia la pert orograficamënter a man dërta dl rü. Le rü instëss gnarà amplié – dandaldöt dala pert orograficamënter a man ćiampa dl rü - ćina a na lunghëza de 450 metri. Cun chëstes mosöres dess döt le raiun dal’entrada dl rü da La Pli tla zona artejanala “Möbel Mareo” ćina Mantëna gnì metü en segurëza, inće por se stravardè dal’ega alta preodüda statisticamënter vigni 300 agn. “Nia ma la zona artejanala, mo inće la strada provinziala tl Comun de Mareo é metüdes al gran prigo dl’ega alta por gaujia dl rü d’Al Plan”, spliga le diretur de repartiziun Rudolf Pollinger. Cun chëstes mosöres gnaràl insciö smendrì le prigo d'inondaziuns, insciö Pollinger.
Indöt él preodü na spëisa de costruziun y de realisaziun di laûrs de indöt 390.000 euro; la fin di laûrs é preodüda por l’otober de chësc ann. L’Ofize sistemaziun de rüs de munt y paralovines lascia alsavëi, che, por gaujia di laûrs nezesciars de desboschamënt y de costruziun di rüs, podaràl sozede che les strades restarà sarades por na dorada de alplü na mesora.
rc
