Atualità
Industria, sorvisc, no profit: Istat y Astat presentëia i dać tl Südtirol
De plü aziëndes, de plü lauranć dependënć, de plü impiegać tl setur publich y ćiamò de plü volontars: chisc é i resultać dl nono censimënt sön l’industria, sön i sorvisc y sön les istituziuns zënza profit dl Südtirol. Les zifres finales é gnüdes presentades incö (24 de messè) a Balsan dal’Istat y dal’Astat. Le Presidënt dla Provinzia Arno Kompatscher à alzè fora dandaldöt le svilup tl volontariat.
La gran partezipaziun de volontars te organisaziuns zënza profit tl Südtirol y le consolidamënt dles aziëndes: chisc é n valgügn di resultać prinzipai dl censimënt dl’Astat y dl’Istat sön le svilup dles aziëndes y dl volontariat presentà incö (ai 24 de messè) a Balsan. Le censimënt vëgn fat vigni 10 agn y é gnü condüt sön na mesaria rapresentativa de indöt 43 mile aziëndes, 5 mile istituziuns zënza profit y 189 istituziuns publiches. I dać presentà incö mostra n aumënt dl 17,8 porcënt di dependënć tles aziëndes en confrunt al 2001, n aumënt cater iadi tan gran en confrunt al nordest dla Talia. Implü s’à ti ultimi diesc agn confermè le setur dl volontariat tl Südtirol y é atualmënter, cun n valur mesan de 97,6 istituziuns zënza profit vigni 10 mile abitanć, al pröm post tla Talia. Le 93,1 porcënt dles porsones é volontars, dandaldöt jogn. Al é gnü registré inće na diminuziun dl numer dles istituziuns publiches (189, manco 16,4 porcënt en confrunt al 2001), al é indere aumentè le personal ( plü 17,6 porcënt, zirca 44 mile dependënć). Chësc aumënt é na conseguënza dl anuzamënt plü alt dl laûr part-time, dl potenziamënt di sorvisc por les persones atempades y dles competënzes nöies che la Provinzia à ciafè.
„Gonot vëgnel fat le fal da conscidré chisc dać ma sciöche na scëmpla seria de numeri, mo ai contëgn en verité indicaziuns importantes sön l’ativité dla politica, dl’aministraziun publica y dles istituziuns soziales“, à sotligné le Presidënt dla Provinzia Arno Kompatscher incö tratan la presentaziun. Döt adöm é i dać dl 2011 n bun resultat por le Südtirol, „ai é n reconoscimënt por la Junta Provinziala da denant y inće por mi predezessur.“ N segnal dër important, secundo Kompatscher, é i dać por ći che reverda l’ativité tl volontariat: „Chisc dać é n segnal dër sterch d’identificaziun dla popolaziun cun so paîsc de residënza, mo inće n segnal che la tradiziun dl impëgn sozial por la comunité é stabil y é gnü renforzè cun le passè dl tëmp.
Por ći che reverda les aziëndes y i dependënć à dit le Presidënt dla Provinzia che l’inrescida statistica é gnüda fata dan da trëi agn y che intratan él sozedü la crisa economica, „mo impò pol gnì dit che le Südtirol à tignit fora chësta crisa valgamia bun: la dejocupaziun é aumentada, mo al é inće aumentè le numer di dependënć“. Inultima à recordè Kompatscher che le numer de impiegà tl setur publich é aumentè dandaldöt tl’educaziun: „I sorvisc publics ne dess nia avëi na conotaziun negativa, deache ai pita düć i sorvisc de chi che la coletivité a debojëgn.“
Düć i resultać sön le cesimënt sön l’industria, i sorvisc y les organisaziuns no profit é desponibili sön la plata web dl’Istat sot a chësta misciun: http://censimentoindustriaeservizi.istat.it/.
rc
