Atualità
Direziun Generala: Indöt zirca 60 candidatöres
Incö, lönesc ai 28 de messè, dales 12 da misdé él scadü l’ultimo terminn por dè jö la domanda por se candidé por un di posć plü alć dl'aministraziun publica: chël por deventè diretur general o direturia generala. „Indöt él rové ite 60 candidatöres y les poscibilitês che i sunse bugn da ciafè na porsona competënta é altes “, à dit l’assessuria por l’aministraziun publica Waltraud Deeg.
Cun la lege sön la finanza dl 2014 é la direziun generala y le secretariat general gnüs despartis tl’aministraziun publica. Le diretur general nü / la direturia generala nöia gnarà chirida fora tres n concurs de seleziun. „La figöra de livel plü alt tl’aministraziun publica messarà se crüzié de n’aministraziun publica moderna, efizienta y cun n orientamënt de vijinanza ai zitadins“, à splighé l’assessuria Deeg.
Indöt s’à candidé 60 porsones por le post. Le proscimo vare sarà śëgn n’ejaminaziun di candidać y dles candidates, por controlè sce bëgn düć ademplësc i criters damanà. Daldô saràl spo na comisciun che tolarà la dezijiun sön les cualificaziuns di candidać. „La prozedöra dess gnì stlüta jö te na manira profescionala y coscienziosa“, insciö Deeg. L’aministraziun publica é formada da indöt 18.000 colaboradus y à n bilanz d’aministraziun de cinch miliarg de euro. „Tles mans dl diretur nü o dla direturia nöia gnaràl ponü la reorganisaziun dl’aministraziun publica, la scemplificaziun dles prozedöres aministratives, le control sura les ressurses economiches y personales sciöche inće la suravijiun di ofizi de direziun“, à stlüt jö Degg.
rc
